കോട്ടയം: കോണ്‍ഗ്രസിലെ ഗ്രൂപ്പ് പോരുകള്‍ക്കൊടുവില്‍ നേതൃമാറ്റമുണ്ടാകുമെന്ന സൂചനകളെ ശരിവെച്ച് തിരുവഞ്ചൂര്‍ രാധാകൃഷ്ണന്‍. കെപിസിസി പ്രസിഡന്റ് സ്ഥാനത്ത് നിന്നും വി.എം സുധീരനെ മാറ്റുന്ന കാര്യം ഹൈക്കമാന്‍ഡ് പരിശോധിക്കുകയാണ്. ഹൈക്കമാന്‍ഡ് തീരുമാനം വൈകില്ലെന്നാണ് കരുതുന്നത്. കെപിസിസി പ്രസിഡന്റെന്ന നിലയില്‍ പാര്‍ട്ടി ഏകോപനത്തില്‍ അദ്ദേഹം പരാജയമാണ്. എല്ലാവരെയും ഒരുമിച്ച് കൊണ്ടുപോകാനുളള ഉത്തരവാദിത്വം അദ്ദേഹം നിര്‍വഹിക്കുന്നില്ല. നിലവിലെ രാഷ്ട്രീയ സാഹചര്യങ്ങളോട് പ്രതികരിക്കാനുളള സാഹചര്യം പാര്‍ട്ടിയിലില്ല. സ്വിച്ചിട്ടാല്‍ കറങ്ങുന്നതാണ് പാര്‍ട്ടികമ്മിറ്റികളെന്ന ധാരണ വേണ്ടെന്നും തിരുവഞ്ചൂര്‍ വ്യക്തമാക്കി.
തെരഞ്ഞെടുപ്പിലേറ്റ കനത്ത പരാജയത്തെ തുടര്‍ന്നാണ് കോണ്‍ഗ്രസില്‍ ഗ്രൂപ്പ് പോരുകള്‍ പൂര്‍വാധികം ശക്തിയായത്. തെരഞ്ഞെടുപ്പ് പ്രചാരണവേളയില്‍, സ്ഥാനാര്‍ത്ഥിത്വ നിര്‍ണയത്തില്‍ ഇങ്ങനെ സുധീരന്റെ പലവിധ ഇടപെടലുകള്‍ മൂലമാണ് കനത്ത പരാജയത്തിലേക്ക് കോണ്‍ഗ്രസും യുഡിഎഫും വീണതെന്ന ആരോപണങ്ങള്‍ നേരത്തെ സജീവമായിരുന്നു. കോണ്‍ഗ്രസ് നേതാക്കളായ കെ.സുധാകരന്‍, കെ. ബാബു, അടൂര്‍ പ്രകാശ് എന്നിവര്‍ സുധീരനെതിരെ പരസ്യമായി രംഗത്ത് എത്തുകയും ചെയ്തിരുന്നു. സംസ്ഥാനത്ത് ഗ്രൂപ്പ് വഴക്കും നേതൃമാറ്റമെന്ന ആവശ്യവും ശക്തമായതോടെ ഹൈക്കമാന്‍ഡ് ഇടപെട്ട് കഴിഞ്ഞ ആഴ്ച നേതാക്കളെ ഡല്‍ഹിയിലേക്ക് വിളിപ്പിച്ചിരുന്നു. തുടര്‍ന്നാണ് തീരുമാനം വൈകില്ലെന്ന് സൂചിപ്പിച്ച് തിരുവഞ്ചൂര്‍ എത്തിയത്.
Discussion about this post