ഡല്‍ഹി: കേരളത്തിലെ ക്രൈസ്തവസഭ നേതാക്കള്‍ പ്രധാനമന്ത്രി നരേന്ദ്രമോദിയെ കണ്ടു. ഡല്‍ഹിയില്‍ നടന്ന കൂടിക്കാഴ്ചയില്‍ പരിസ്ഥിതി രംഗത്തും കാര്‍ഷിക രംഗത്തും നേരിടുന്ന ആശങ്കകള്‍ സഭ നേതാക്കള്‍ പങ്കുവച്ചു. കസ്തൂരി രംഗന്‍ റിപ്പോര്‍ട്ടിനെക്കുറിച്ചുള്ള ആശങ്ക മറികടക്കാന്‍ ഇടപെടുമെന്നു പ്രധാനമന്ത്രി നരേന്ദ്ര മോദിയുടെ ഉറപ്പ് നല്‍കിയതായി കൂടിക്കാഴ്ചയ്ക്ക് ശേഷം നേതാക്കള്‍ പറഞ്ഞു
കോടതികളുടെ എതിര്‍പ്പും സന്നദ്ധ സംഘടനകളുടെ നിസഹകരണ നിലപാടും പലപ്പോഴും പ്രശ്‌നപരിഹാരത്തിനു തടസമാകാറുണ്ടെന്നു പ്രധാനമന്ത്രി അറിയിച്ചു. പശ്ചിമഘട്ട സംരക്ഷണത്തിനായുള്ള കസ്തൂരി രംഗന്‍ സമിതി റിപ്പോര്‍ട്ടിലെ ശുപാര്‍ശകളെക്കുറിച്ചു നിലനില്‍ക്കുന്ന ആശങ്കകള്‍ പരിഹരിക്കണമെന്നാവശ്യപ്പെട്ടാണ് കേരളത്തിലെ ക്രൈസ്തവ സഭാ നേതാക്കളും എംപിമാരും പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തിയത്. ആര്‍ച്ചുബിഷപ്പ് കുര്യക്കോസ് ഭരണികുളങ്ങര, മാര്‍ റെമീജിയോസ് ഇഞ്ചനാനിയില്‍ തുടങ്ങിയവര്‍ സംഘത്തിലുണ്ടായിരുന്നു.
പ്രശ്‌നത്തില്‍ അടിയന്തിര പരിഹാരം വേണമെന്ന കേരള എംപിമാരുടെ ആവശ്യം അംഗീകരിച്ച് വനംപരിസ്ഥിതി മന്ത്രി അനില്‍ മാധവ് ദവേ യോഗം വിളിച്ചിട്ടുണ്ട്. പശ്ചിമഘട്ടം ഉള്‍പ്പെടുന്ന സംസ്ഥാനങ്ങളിലെ അറുപതോളം എംപിമാര്‍ യോഗത്തില്‍ പങ്കെടുക്കുന്നുണ്ട്.
Discussion about this post