കണ്ണൂര്‍: നാദാപുരത്ത് യൂത്ത് ലീഗ് പ്രവര്‍ത്തകന്‍ മുഹമ്മദ് അസ്‌ലമിനെ വധിച്ച കേസില്‍ ഒരാള്‍ കൂടി പിടിയിലായി. മുഖ്യ പ്രതിയും സി.പി.എം പ്രവര്‍ത്തകനുമായ നാദാപുരം വെള്ളൂര്‍ സ്വദേശി രമീഷാണ് അറസ്റ്റിലായത്. അസ്‌ലമിനെ പിന്‍തുടര്‍ന്ന് കൊലയാളികള്‍ക്ക് വിവരങ്ങള്‍ നല്‍കിയത് ഇയാളാണെന്ന് പൊലീസ് പറഞ്ഞു. രമീഷിനെ ഇന്ന് നാദാപുരം മജിസ്‌ട്രേറ്റനു മുന്‍പില്‍ ഹാജരാക്കും. നേരത്തെ രണ്ട് പേരെ കേസില്‍ അറസ്റ്റ് ചെയ്തിരുന്നു. പ്രതികളെ കുറിച്ച് പൂര്‍ണമായ വിവരം ലഭിച്ചെന്ന് പൊലീസ് വ്യക്തമാക്കി.
പ്രതികള്‍ക്ക് താമസിക്കാന്‍ സൗകര്യം ഒരുക്കിക്കൊടുത്ത ആളെയും പ്രതികള്‍ക്ക് വാഹനം വാടകയ്ക്ക് എടുത്തുകൊടുത്ത ആളെയുമാണ് നേരത്തെ അറസ്റ്റ് ചെയ്തത്. കാസര്‍ഗോഡ് സ്വദേശിയായ സിപിഐഎം പ്രവര്‍ത്തകന്‍ അനിലാണ് പ്രതികള്‍ക്ക് താമസസൗകര്യം ഒരുക്കിക്കൊടുത്തതിന് പിടിയിലായത്. അതേസമയം ദുര്‍ബ്ബലമായ വകുപ്പുകള്‍ ചേര്‍ത്താണ് പൊലീസ് ഇയാളുടെ അറസ്റ്റ് രേഖപ്പെടുത്തിയതെന്നും, പാര്‍ട്ടിയുടെ ഉന്നത കേന്ദ്രങ്ങള്‍ ഇടപെട്ട് ഇയാള്‍ക്ക് ജാമ്യം അനുവദിച്ചുവെന്നും ആക്ഷേപമുണ്ടായിരുന്നു.
ഈ മാസം 12 ന് വൈകിട്ട് 5.30 ഓടെയാണ് വടകരയില്‍ നിന്ന് നാദാപുരത്തേക്ക് ബൈക്കില്‍ പോവുകയായിരുന്ന അസ്‌ലമിനെ പിന്നാലെയെത്തിയ സംഘം വെട്ടിക്കൊലപ്പെടുത്തിയത്. കാറിലെത്തിയ സംഘം അസ്‌ലമിനെ ഇടിച്ചിട്ട ശേഷം വെട്ടുകയായിരുന്നു. ഗുരുതരമായി പരിക്കേറ്റ അസ്‌ലമിനെ ആശുപത്രിയില്‍ പ്രവേശിപ്പിച്ചെങ്കിലും മരണം സംഭവിക്കുകയായിരുന്നു. സിപിഐഎം പ്രവര്‍ത്തകനായിരുന്ന തൂണേരി ഷിബിനെ വധിച്ച കേസില്‍ കോടതി വെറുതെ വിട്ട പ്രതികളില്‍ ഒരാളായിരുന്നു അസ്‌ലം.
Discussion about this post