ജലന്ധര്‍: കശ്മീരിലെ ഉറിയില്‍ കരസേനാ താവളത്തിനു നേരെയുണ്ടായ ഭീകരാക്രമണത്തിന്റെ പശ്ചാത്തലത്തില്‍ അന്താരാഷ്ട്ര തലത്തില്‍ പാകിസ്ഥാനെ ഒറ്റപ്പെടുത്തുമെന്ന് കേന്ദ്ര മന്ത്രി അരുണ്‍ ജയ്റ്റ്‌ലി. നയതന്ത്ര തലത്തില്‍ ഇതിനായുള്ള ശ്രമങ്ങള്‍ ഇന്ത്യ ശക്തിപ്പെടുത്തുമെന്ന് ജയ്റ്റ്‌ലി വ്യക്തമാക്കി. ഉറി ഭീകരാക്രമണത്തില്‍ ഉത്തരവാദിത്തം ഉള്ളവരെല്ലാം ഗുരുതര പ്രത്യാഘാതങ്ങള്‍ നേരിടേണ്ടി വരുമെന്നും അരുണ്‍ ജയ്റ്റ്‌ലി ട്വിറ്ററില്‍ മുന്നറിയിപ്പ് നല്‍കി.
കശ്മീരിനെ ഇന്ത്യയുടെ ഭാഗമായി അംഗീകരിക്കാന്‍ സ്വാതന്ത്ര്യം കിട്ടി ഇത്ര വര്‍ഷമായിട്ടും പാകിസ്ഥാന്‍ തയ്യാറായിട്ടില്ല. ഇതിന്റെ ഭാഗമായാണ് അവര്‍ രാജ്യത്ത് ഭീകരത ഇളക്കി വിടുന്നതെന്ന് ജയ്റ്റ്‌ലി ആരോപിച്ചു. ഭീരുത്വത്തിന്റെ പ്രകടനമാണ് ഭീകരരുടെ ഭാഗത്ത് നിന്ന് ഉറിയില്‍ കണ്ടത്. പത്താന്‍കോട്ടിന് ശേഷം ഇപ്പോള്‍ ഉറിയില്‍ ആക്രമണം ഉണ്ടായിരിക്കുന്നു. നമ്മുടെ സുരക്ഷാസേനയ്ക്ക് ഇത്തരം ആക്രമണങ്ങള്‍ വലിയ വെല്ലുവിളിയാണ് ജയ്റ്റ്‌ലി പറഞ്ഞു. 17 സൈനികരാണ് ഉറി ഭീകരാക്രമണത്തില്‍ കൊല്ലപ്പെട്ടത്. പാകിസ്ഥാനില്‍ നിന്ന് വന്ന ജയ്‌ഷെ ഇ മുഹമ്മദ് പ്രവര്‍ത്തകരാണ് ആക്രമണത്തിന് പിന്നിലെന്നാണ് സൈന്യത്തിന്റെ ആരോപണം.
Discussion about this post