ഷില്ലോങ്ങ്: വിവാദങ്ങളില്‍ നിറഞ്ഞ മേഘാലയ ഗവര്‍ണര്‍ വി.ഷണ്മുഖനാഥന് രാജിവെച്ചു. ലൈംഗിക ആരോപണങ്ങളെ തുടര്‍ന്നാണ് ഗവര്‍ണര്‍സ്ഥാനം രാജിവെച്ചത്. 67-കാരനായ ഗവര്‍ണര്‍ക്കെതിരെ ഗുരുതര ആരോപണങ്ങള്‍ ഉന്നയിച്ച്‌ രാജ്ഭവന്‍ ജീവനക്കാര്‍ രാഷ്ട്രപതി പ്രണബ് മുഖര്‍ജി, പ്രധാനമന്ത്രി നരേന്ദ്രമോദി എന്നിവര്‍ക്ക് കത്തയച്ചിരുന്നു.
ഗവര്‍ണറെ നീക്കംചെയ്ത് രാജ്ഭവന്റെ അന്തസ്സ് പുനഃസ്ഥാപിക്കാന്‍ ഇടപെടണമെന്ന് ആവശ്യപ്പെട്ട് ഏകദേശം നൂറോളം രാജ്ഭവന്‍ ജീവനക്കാരണ് പരാതിപ്പെട്ടത്. രാജ്ഭവനെ ലേഡീസ് ക്ലബ് ആക്കി ഗവര്‍ണര്‍ മാറ്റിയെന്നായിരുന്നു പ്രധാന ആരോപണം. ഗവര്‍ണറുടെ നേരിട്ടുള്ള ഉത്തരവില്‍ സ്വകാര്യ കിടപ്പുമുറി വരെ നിരവധി യുവതികളെത്തുന്നതായി പരാതില്‍ വ്യക്തമാക്കിയിരുന്നു.
ഷണ്‍മുഖനാഥന്റെ പ്രവൃത്തികള്‍ ജീവനക്കാരുടേയും രാജ്ഭവന്റെ തന്നെയും അഭിമാനത്തിന് ക്ഷതമേല്‍പ്പിക്കുന്നുവെന്നാണ് പ്രധാനമന്ത്രിക്ക് നല്‍കിയ അഞ്ച് പേജ് വരുന്ന കത്തില്‍ പറയുന്നത്. കത്തിന്റെ പകര്‍പ്പ് രാഷ്ട്രപതി ഭവനും അയച്ചിരുന്നു. ഗവര്‍ണറെ നീക്കണമെന്ന് ആവശ്യപ്പെട്ട് സ്ത്രീപക്ഷ സംഘടനകള്‍ ശക്തമായ പ്രചരണം നടത്തിയിരുന്നു. ഗവര്‍ണറുടെ സ്ത്രീകളോടുള്ള പെരുമാറ്റം സംബന്ധിച്ച്‌ മറ്റ് റിപ്പോര്‍ട്ടുകളും പുറത്തുവന്നിരുന്നു.
തമിഴ്നാട്ടില്‍ നിന്നുള്ള ഷണ്മുഖനാഥന് 2015 മെയ് 20 നാണ് മേഘാലയയുടെ ഗവര്‍ണറായി സ്ഥാനമേറ്റത്. ജെ.പി.രാജ്ഖോവയെ നീക്കിയതിനെത്തുടര്‍ന്ന് 2016 സെപ്റ്റംബര്‍ 16-ന് ഷണ്മുഖനാഥന് അരുണാചല്‍ പ്രദേശിന്റെ അധിക ചുമതലയും നല്‍കിയിരുന്നു.
Discussion about this post