തിരുവനന്തപുരം: ലോ അക്കാദമി കോളേജിലെ സമരം ഒത്ത് തീര്‍ക്കുന്നതിന് വിദ്യാഭ്യാസമന്ത്രി വിളിച്ച് ചേര്‍ത്ത ചര്‍ച്ച പരാജയപ്പെട്ടു. ലഷ്മി നായര്‍ അഞ്ച് വര്‍ഷം മാറി നില്‍ക്കുമെന്ന മാനേജ്‌മെന്റ് ആവശ്യം വിദ്യാര്‍ത്ഥികള്‍ തള്ളിയതോടെ വിദ്യാഭ്യാസമന്ത്രി യോഗത്തില്‍ നിന്ന് ഇറങ്ങിപ്പോയി.
സമരം ചെയ്യുന്ന വിദ്യാര്‍ത്ഥികളും വിദ്യാഭ്യാസമന്ത്രിയും തമ്മില്‍ ചര്‍ച്ചയ്ക്കിടെ ശക്തമായ വാക്ക് തര്‍ക്കമുണ്ടായി. ലഷ്മി നായര്‍ രാജിവെക്കണം എന്ന ആവശ്യത്തില്‍ നിന്ന് പിന്നോട്ടില്ലെന്ന് വിദ്യാര്‍ത്ഥികള്‍ ശക്തമായ നിലപാടെടുത്തു. എന്നാല്‍ അഞ്ച് വര്‍ഷം അവര്‍ മാറി നില്‍ക്കാമെന്ന് സമ്മതിച്ചുവുല്ലോ എന്നായിരുന്നു വിദ്യാഭ്യാസമന്ത്രിയുടെ നിലപാട്. തുടര്‍ന്ന് മാനേജ്‌മെന്റ് വാദം ഞങ്ങളോട് പറയാതെ ഞങ്ങള്‍ പറയുന്നത് മാനേജ്‌മെന്റിനോട് പറയു എന്നായി വിദ്യാര്‍ത്ഥികള്‍, ഇതോടെ ക്ഷുഭിതനായ വിദ്യാഭ്യാസമന്ത്രി ചര്‍ച്ചയ്ക്കിടയില്‍ നിന്ന് ഇറങ്ങിപോയി.
വിദ്യാഭ്യാസമന്ത്രി മാനേജ്‌മെന്റിന് വേണ്ടി നിലകൊണ്ടുവെന്ന് വിദ്യാര്‍ത്ഥിനികളും, വിദ്യാര്‍ത്ഥി നേതാക്കളും പറഞ്ഞു. രാജി എന്ന ആവശ്യം നടപ്പില്ലെന്ന് അക്കാദമി മാനേജ്‌മെന്റ് യോഗത്തില്‍ നിലപാടെടുത്തു.
പ്രശ്‌നം പരിഹരിക്കാന്‍ സര്‍ക്കാരിന് ഇച്ഛാശക്തിയില്ലെന്ന് വിദ്യാര്‍ത്ഥി നേതാക്കള്‍ പറഞ്ഞു
അതേസമയം തിങ്കളാഴ്ച റഗുലര്‍ ക്ലാസുകള്‍ തുടങ്ങുമെന്ന് മാനേജ്മന്റ് അറിയിച്ചു. എല്ലാ വിദ്യാര്‍ത്ഥികളും ക്ലാസില്‍ കയറണമെന്ന് മാനേജ്‌മെന്റ് ആവശ്യപ്പെട്ടു. കോളേജ് തുറക്കണമെന്നാണ് മന്ത്രിയുടെ നിലപാടെന്നും അത് വിദ്യാര്‍ത്ഥികള്‍ക്ക് ഗുണകരമെന്നും മാനേജ്‌മെന്റ് പ്രതിനിധികള്‍ പറഞ്ഞു.
Discussion about this post