തിരുവനന്തപുരം വിദ്യാര്ത്ഥി പ്രതിഷേധം ഭയന്ന തിരുവനന്തപുരം ലോ അക്കാദമി അനിശ്ചിതകാലത്തേക്ക് അടച്ചിട്ടു. എസ്എഫ്ഐയുമായി ഉണ്ടാക്കിയ ഒത്തുതീര്പ്പ് അനുസരിച്ച് തിങ്കളാഴ്ച ക്ലാസ് തുടങ്ങുമെന്ന പ്രഖ്യാനത്തില്നിന്ന് മറ്റ് വിദ്യാര്ത്ഥികളുടെ പ്രതിഷേധത്തെ തുടര്ന്ന് അക്കാദമി പിന്വാങ്ങുകയായിരുന്നു.
സര്വകലാശാലയുടെ ചട്ടങ്ങള് ലംഘിച്ചതിനാല് അക്കാദമിയുടെ അഫിലിയേഷന് റദ്ദാക്കണമെന്ന പ്രതിപക്ഷ അംഗങ്ങളുടെ ആവശ്യം ഉള്പ്പെടെ ഇന്നത്തെ സിന്ഡിക്കറ്റ് യോഗം ചര്ച്ച ചെയ്യും. സിന്ഡിക്കറ്റ് യോഗത്തിനു മുന്പ് കോണ്ഗ്രസ് അംഗങ്ങളുടെ യോഗം കെപിസിസിയില് ചേരുന്നുണ്ട്. ലോ അക്കാദമിയുടെ ഭൂമി ഉപയോഗവുമായി ബന്ധപ്പെട്ട പരാതികളില് കഴമ്പുണ്ടെന്നും ഹോട്ടലും ബാങ്കും അക്കാദമി ഭൂമിയില് പ്രവര്ത്തിക്കുന്നുണ്ടെന്നും ഡപ്യൂട്ടി കലക്ടര് നല്കിയ റിപ്പോര്ട്ടിന്റെ അടിസ്ഥാനത്തില് റവന്യു പ്രിന്സിപ്പല് സെക്രട്ടറി പി.എച്ച്.കുര്യന്റെ നേതൃത്വത്തിലുള്ള പരിശോധന ഇന്നോ നാളെയോ നടക്കും.
എസ്എഫ്ഐയുമായുള്ള ഒത്തുതീര്പ്പ് അനുസരിച്ച് തിങ്കളാഴ്ച പൊലീസ് സഹായത്തോടെ ക്ലാസ് നടത്താനായിരുന്നു അക്കാദമിയുടെ നേരത്തെയുള്ള തീരുമാനം. ഇതനുസരിച്ച് പരമാവധി കുട്ടികളെ ക്ലാസിലെത്തിക്കാനുള്ള ശ്രമങ്ങള് എസ്എഫ്ഐയും നടത്തിയിരുന്നു. ഈ ശ്രമം ഫലിക്കില്ലെന്നായതോടെയാണ് അനിശ്ചിതകാലത്തേക്ക് അടച്ചിടാനുള്ള തീരുമാനം അക്കാദമി എടുത്തത്.
പ്രശ്നം പരിഹരിക്കുന്നതിന് പകരം കോളെജ് അനിശ്ചിത കാലത്തേക്ക് അടച്ചിടുന്നതിലൂടെ മാനേജുമെന്റ് ഒളിച്ചോടുകയാണെന്ന് സമരം ചെയ്യുന്ന വിദ്യാര്ത്ഥികള് പ്രതികരിച്ച. കോളെജ് അനിശ്ചിതകാലത്തേക്ക് അടച്ചിടാന് മാനേജുമെന്റ് നിര്ബന്ധിതമായത് തന്നെ സമരവിജയമാണെന്നും വിദ്യാര്ത്ഥികള് പ്രതികരിച്ചു.
സമരം ഒത്തുതീര്പ്പാക്കുന്നതിന് ഇന്നലെ വിദ്യാഭ്യാസ മന്ത്രി സി രവീന്ദ്രനാഥ് നടത്തിയ ചര്ച്ച പരാജയപ്പെട്ടിരുന്നു. ചര്ച്ചയില്നിന്ന് ക്ഷുഭിതനായി മന്ത്രി ഇറങ്ങിപ്പോവുകയും ചെയ്തു. യോഗത്തില്നിന്ന് വിദ്യാഭ്യാസ മന്ത്രി ഇറങ്ങിപ്പോയതിനെ ശക്തമായ ഭാഷയിലാണ് പ്രതിപക്ഷവും സമരരംഗത്തുള്ള വിദ്യാര്ത്ഥികളും വിമര്ശിച്ചത്. മന്ത്രിയുടെ നടപടിയെ സിപിഐ നേതാവ് പന്ന്യന് രവീന്ദ്രനും വിമര്ശിച്ചിരുന്നു.
വിദ്യാഭ്യാസമന്ത്രി ചര്ച്ചയില് 10 മിനിറ്റ് സഹനശക്തി കാട്ടിയിരുന്നെങ്കില് സമരം ഇന്നലെ തീര്ന്നേനെയെന്നായിരുന്നു പന്ന്യന്റെ പ്രതികരണം. അടിയന്തരമായി വിദ്യാഭ്യാസമന്ത്രി വീണ്ടും പ്രശ്നത്തില് ഇടപെടണം. പാദസേവ നടത്തുന്നത് ശരിയല്ല.
ചര്ച്ചയില് നിന്നും മന്ത്രി ഇറങ്ങിപ്പോയത് ശരിയല്ല. മാനെജ്മെന്റ് പ്രിന്സിപ്പലിനെ മാറ്റാന് തയ്യാറായപ്പോള് ഒരു വിദ്യാര്ത്ഥി സംഘടന ചര്ച്ച വഴിതിരിച്ചുവിടുകയാണ് ഉണ്ടായതെന്നും പന്ന്യന് എസ്എഫ്ഐയെ കുറ്റപ്പെടുത്തി പറഞ്ഞിരുന്നു. എസ്എഫ്ഐയുടെ ഈഗോ അനുസരിച്ച് സമരം തീര്ക്കാന് പറ്റില്ല. കേരളം എല്ലാം കാണുന്നുണ്ടെന്ന് ഓര്ക്കണമെന്നും പന്ന്യന് രവീന്ദ്രന് രാവിലെ ചൂണ്ടിക്കാട്ടുകയുണ്ടായി.
Discussion about this post