ന്യൂഡൽഹി: പാർലമെന്റിനകത്തെ ദൃശ്യങ്ങൾ പകർത്തി സോഷ്യൽ മീഡിയയിൽ പോസ്റ്റ് ചെയ്ത കോൺഗ്രസ് വനിതാ എംപിക്ക് സസ്പെൻഷൻ. രാജ്യസഭാ എംപി രജനി അശോക് റാവു പാട്ടീലിനെയാണ് സസ്പെൻഡ് ചെയ്തത്. രാജ്യസഭാ ചെയർമാൻ ജഗ്ദീപ് ധൻകറിന്റേതാണ് നടപടി.
പ്രധാനമന്ത്രി നരേന്ദ്രമോദിയുടെ നന്ദിപ്രമേയ ചർച്ചയ്ക്കിടെ പ്രധാനമന്ത്രിക്കെതിരെ പ്രതിപക്ഷ അംഗങ്ങൾ നടത്തിയ പ്രതിഷേധത്തിന്റെ ദൃശ്യങ്ങളാണ് ഇവർ പകർത്തി ട്വിറ്ററിൽ പോസ്റ്റ് ചെയ്തത്. അംഗത്തിന്റെ ഭാഗത്ത് നിന്നുണ്ടായത് അനാരോഗ്യകരമായ പ്രവൃത്തിയാണെന്ന് രാജ്യസഭാ ചെയർമാൻ വിലയിരുത്തി. ഇതിനെ ഗൗരവത്തോടെ കാണേണ്ടതുണ്ടെന്നും അദ്ദേഹം പറഞ്ഞു.
സഭയുടെ പവിത്രത കാത്തുസൂക്ഷിക്കാൻ പുറത്തുനിന്നുളള ഏജൻസികളുടെ ഇടപെടൽ ആവശ്യമില്ല. പാർലമെന്റിന്റെ നടപടികൾ പകർത്തി ട്വിറ്റർ പോലുളള ഒരു പൊതു പ്ലാറ്റ്ഫോമിൽ പോസ്റ്റ് ചെയ്തത് വഴി പാർലമെന്റ് മര്യാദകളാണ് അംഗം ലംഘിച്ചതെന്ന് ജഗ്ദീപ് ധൻകർ പറഞ്ഞു. മുതിർന്ന അംഗങ്ങളെ ചേമ്പറിൽ വിളിച്ച് ഇക്കാര്യത്തിൽ അവരുടെ അഭിപ്രായം ആരാഞ്ഞിരുന്നതായും രാജ്യസഭാ ചെയർമാൻ വ്യക്തമാക്കി.
ബജറ്റ് സെക്ഷനിലേക്കാണ് സസ്പെൻഷൻ. സംഭവം പാർലമെന്റിന്റെ പ്രിവലേജ് കമ്മിറ്റി അന്വേഷിക്കുമെന്നും ജഗ്ദീപ് ധൻകർ പറഞ്ഞു.
