ഹേമ കമ്മിറ്റി റിപ്പോര്‍ട്ട് ഉയര്‍ത്തി വിട്ട അലയൊലികള്‍ ഇതുവരെ അവസാനിച്ചിട്ടില്ല. മോഹന്‍ലാലും മമ്മൂട്ടിയുമടക്കമുള്ള നിരവധി താരങ്ങള്‍ റിപ്പോര്‍ട്ടില്‍ പ്രതികരണവുമായി രംഗത്തെത്തിയിരുന്നു.
ഹേമ കമ്മിറ്റി റിപ്പോര്‍ട്ടില്‍ പതിനഞ്ചംഗ പവര്‍ ഗ്രൂപ്പിനെക്കുറിച്ച് പരാമര്‍ശമുണ്ട്. ആരൊക്കെയാണ് പവര്‍ ഗ്രൂപ്പിലുള്ളതെന്ന് ചോദിച്ചുകൊണ്ട് നിരവധി പേര് രംഗത്തെത്തിയിരുന്നു. ഇതുമായി ബന്ധപ്പെട്ട് ധ്യാന്‍ ശ്രീനിവാസന്‍ നടത്തിയ ഒരു പരാമര്‍ശമാണ് സോഷ്യല്‍ മീഡിയയില്‍ വൈറലാകുന്നത്. ഒരു ചടങ്ങിനിടയിലാണ് ധ്യാന്‍ ശ്രീനിവാസന്റെ പ്രതികരണം.
താനാണ് പവര്‍ ഗ്രൂപ്പ് എന്നു ധ്യാന്‍ വീഡിയോയില്‍ പറയുന്നുണ്ട് അങ്ങനെ പറയാനുള്ള. കാരണവും ധ്യാന്‍ തന്നെ പറയുന്നുണ്ട്. ‘ഇവിടെ ഹേമ കമ്മിറ്റി റിപ്പോര്‍ട്ടില്‍ ഒരു പവര്‍ ഗ്രൂപ്പിനെ പറ്റി പറയുന്നുണ്ട്. കേട്ടിട്ടുണ്ടോ? അങ്ങനെ പറയുമ്പോള്‍ ഏറ്റവും കൂടുതല്‍ സിനിമ ചെയ്യുന്ന ഞാനല്ലേ പവര്‍ ഗ്രൂപ്പ്. ആ പവര്‍ ഗ്രൂപ്പില്‍പെട്ട ആളാണ്. സിനിമ വരുമ്പോഴല്ലേ ചെയ്യാന്‍ പറ്റുള്ളൂ. കിട്ടുമ്പോള്‍ ചെയ്യുക. അത്രയേയുള്ളൂ.’- എന്നാണ് ധ്യാന്‍ വീഡിയോയില്‍ പറയുന്നത്.
പവര്‍ ഗ്രൂപ്പില്‍ സംവിധായകരും നടന്മാരും നിര്‍മാതാക്കളും ഉള്‍പ്പെട 15 ആളുകള്‍ ഉണ്ടെന്നാണ് റിപ്പോര്‍ട്ടിലെ പരാമര്‍ശം. മലയാള സിനിമയിലെ ഒരു നടന് ഈ ഗ്രൂപ്പിനെ മാഫിയ സംഘം എന്ന് വിളിച്ചതായും റിപ്പോര്‍ട്ടില്‍ ചൂണ്ടികാട്ടുന്നു . ഈ നടന് അപ്രഖ്യാപിത വിലക്കുകാരണം പിന്നീട് സീരിയല്‍ രംഗത്തേക്ക് പോകേണ്ടി വന്നതായും ഹേമ കമ്മിറ്റി റിപ്പോര്‍ട്ടില്‍ പരാമര്‍ശമുണ്ട്.
അതേസമയം, കഴിഞ്ഞ ദിവസം ധ്യാന്‍ ശ്രീനിവാസന്‍ നായകനാകുന്ന പുതിയ സിനിമയുടെ പ്രഖ്യാപനം ഉണ്ടായിരുന്നു ‘ഡിറ്റക്ടീവ് ഉജ്ജ്വല്‍’ എന്നാണ് സിനിമയുടെ പേര്. സോഫിയ പോളിന്റെ വീക്കെന്‍ഡ് സിനിമാറ്റിക് ബാനറിലാണ് ചിത്രമൊരുങ്ങുന്നത്. ഡിറ്റക്ടീവ് ഉജ്ജ്വല്‍ പുതിയ കേസ് ഏറ്റെടുക്കുന്നതാണ് സിനിമയുടെ ഇതിവൃത്തമെന്നാണ് സൂചന. റമീസ് ആര്‍ സി ആണ് സംഗീതമൊരുക്കുന്നത്.
