രാജസ്ഥാനിൽ കോൺഗ്രസിന്റെ തിരഞ്ഞെടുപ്പ് നാടകം; 19 പുതിയ ജില്ലകൾ പ്രഖ്യാപിച്ച് അശോക് ഗെഹ്ലോട്ട്

ജയ്പൂർ: നിയമസഭാ തിരഞ്ഞെടുപ്പ് പടിവാതിലിൽ എത്തി നിൽക്കേ രാജസ്ഥാനിൽ 19 പുതിയ ജില്ലകൾ പ്രഖ്യാപിച്ച് മുഖ്യമന്ത്രി അശോക് ഗെഹ്ലോട്ട്. നിയമസഭയിലാണ് മൂന്ന് ഡിവിഷനുകളും 19 ജില്ലകളും അശോക് ഗെഹ് ലോട്ട് പ്രഖ്യാപിച്ചത്. ഇത്രയധികം ജില്ലകൾ ഒരു സംസ്ഥാനത്ത് ഒരുമിച്ച് രൂപീകരിക്കുന്നത് അത്യപൂർവ്വമാണ്. 19 ജില്ലകൾ കൂടി നിലവിൽ വരുന്നതോടെ സംസ്ഥാനത്ത് 52 ജില്ലകളാകും.

സംസ്ഥാനത്ത് പാർട്ടിക്കുളളിലെ പോരും ഭരണവീഴ്ചകളും കോൺഗ്രസിന് ഭരണം നഷ്ടപ്പെടുത്തുമെന്ന പ്രചാരണം ശക്തമായിരിക്കെയാണ് ഗെഹ്ലോട്ടിന്റെ അറ്റകൈ പ്രയോഗം. പുതിയ ചില്ല ജില്ലകൾക്കായി ആവശ്യം ഉയർന്നിരുന്നു. ഉന്നതതല കമ്മിറ്റി ഇക്കാര്യം പരിശോധിച്ച് അന്തിമ റിപ്പോർട്ട് നൽകിയിട്ടുണ്ട്. അതിന്റെ അടിസ്ഥാനത്തിൽ പുതിയ ജില്ലകൾ പ്രഖ്യാപിക്കുകയാണെന്ന് പറഞ്ഞാണ് മുഖ്യമന്ത്രി പുതിയ ജില്ലകളുടെ വിവരം സഭയിൽ അവതരിപ്പിച്ചത്.

പല ജില്ലകളിലും ഒരറ്റത്ത് നിന്ന് മറ്റൊരറ്റത്ത് എത്താൻ 100 കിലോമീറ്ററോളം സഞ്ചരിക്കേണ്ടി വരുന്നുണ്ട്. സർക്കാർ സേവനങ്ങൾ എത്തിക്കുന്നതിന് ഇത് തടസമാകുന്നുണ്ടെന്ന് പറഞ്ഞാണ് മുഖ്യമന്ത്രി ജില്ലകളുടെ രൂപീകരണത്തെ ന്യായീകരിച്ചത്. ജില്ലകൾ ചെറുതാണെങ്കിൽ ക്രമസമാധാനം മികച്ച നിലയിൽ പരിപാലിക്കാനാകുമെന്നും ഭരണം മെച്ചപ്പെടുത്താനാകുമെന്നും ഗെഹ് ലോട്ട് പറഞ്ഞു. നിലവിൽ 33 ജില്ലകളാണ് രാജസ്ഥാനിലുളളത്.

കനാലുകളിലെയും അണക്കെട്ടുകളിലെയും ജലസേചനം മെച്ചപ്പെടുത്താനും വെളളം ഉപയോഗ ശൂന്യമാക്കുന്നത് തടയാനും ലക്ഷ്യമിട്ട് 37 കോടി രൂപയുടെ പദ്ധതിക്കും അംഗീകാരം നൽകിയതായി ഗെഹ്ലോട്ട് സഭയിൽ അറിയിച്ചു.