നിയമങ്ങള്‍ കാറ്റില്‍പ്പറത്തി ജനങ്ങളെ കൊള്ളയടിക്കുന്ന അനധികൃത വാട്‌സാപ് ലോട്ടറി മാഫിയ സംഘം വ്യാപകം. ടോക്കണ്‍ ഒന്നിന് നൂറ് മുതല്‍ ആയിരം രൂപ വരെ ഓണ്‍ലൈന്‍ വഴി പിരിച്ചെടുത്താണ് ലോട്ടറി നടത്തിപ്പ്. നറുക്കെടുപ്പില്‍ അട്ടിമറി നടത്തിയും ഓരോ നറുക്കെടുപ്പിന്റെയും പേരില്‍ മാഫിയ ദിവസേന തട്ടുന്നത് പതിനായിരങ്ങളാണ്.
ലക്കിഡ്രോ ഗ്രൂപ്പുകളുടെ ലിങ്കുകള്‍ ഭാഗ്യാന്വേഷികളെ തേടിയെത്തുന്നതോടെയാണ് എല്ലാത്തിനും തുടക്കം. കൊല്ലം പൂയപ്പള്ളി സ്വദേശിയുടെ വാട്‌സാപ് ലക്കി ഡ്രോ ഗ്രൂപ്പില്‍ ഇത് 90ാം നറുക്കെടുപ്പ്. ടിക്കറ്റ് വില 130 രൂപ. ഒന്നാം സമ്മാനം പതിനായിരം രൂപ. രണ്ട് മുതല്‍ അഞ്ച് വരെയുള്ള സ്ഥാനക്കാര്‍ക്ക് 500രൂപ വീതം.
ലോട്ടറി ടിക്കറ്റുകളില്ല പകരം ടോക്കണാണ്. ഒന്ന് മുതല്‍ നൂറുവരെയുള്ള ഏത് നമ്പറും തിരഞ്ഞെടുക്കാം. ടോക്കണ്‍ നമ്പര്‍ ഗ്രൂപ്പില്‍ മെസേജായി അറിയിക്കണം പിന്നാലെ പണം അടച്ചതിന്റെ തെളിവും പങ്കുവെയ്ക്കണം. പണം അയക്കേണ്ട നമ്പര്‍ നിയമാവലിക്കൊപ്പം തന്നെയുണ്ട്.
അക്കൗണ്ടിലേക്ക് എല്ലാവരുടെയും പണമെത്തിയാല്‍ മാത്രമാണ് നറുക്കെടുപ്പ്. പിന്നാലെ ടോക്കണുകളുടെ ഫോട്ടോ ഗ്രൂപ്പിലെത്തും. നറുക്കെടുപ്പ് വീഡിയോ കോള്‍ വഴി ലൈവ്. കാണാന്‍ കഴിയാത്തവര്‍ക്ക് നറുക്കെടുപ്പ് ചിത്രീകരിച്ചും പങ്കുവെയ്ക്കും.
Discussion about this post