ഡല്ഹി: നടിയെ ആക്രമിച്ച കേസില് നടന് ദിലീപ് നല്കിയ ഹര്ജിയില് സുപ്രീംകോടതി ഇന്ന് വിധി പറയും. നടിയെ ആക്രമിക്കുന്ന ദൃശ്യങ്ങളുടെ പകര്പ്പ് ആവശ്യപ്പെട്ടാണ് ദിലീപ് ഹര്ജി നല്കിയിരിക്കുന്നത്. ദൃശ്യങ്ങള് കേസിലെ പ്രധാന രേഖയായതിനാല് അത് ലഭിക്കാന് തനിക്ക് അര്ഹതയുണ്ടെന്നായിരുന്നു ദിലീപിന്റെ വാദം.
ജസ്റ്റിസുമാരായ എ.എം ഖാന്വില്ക്കര്, ദിനേഷ് മഹേഷ്വരി എന്നിവരടങ്ങുന്ന ബഞ്ച് ഇന്ന് രാവിലെ 10.30ന് വിധി പറയും. ദിലീപിന്റെ ആവശ്യത്തെ സര്ക്കാറും നടിയും കോടതിയില് എതിര്ത്തിരുന്നു.
കേസിലെ പ്രധാന തെളിവായ ആക്രമണ ദൃശ്യങ്ങളുടെ പകര്പ്പ് ആവശ്യപ്പെട്ട് ദിലീപ് നല്കിയ ഹര്ജിയില് വാദം പൂര്ത്തിയാക്കി കഴിഞ്ഞ സെപ്റ്റംബര് 17നാണ് വിധി പറയാന് മാറ്റിവെച്ചത്. മെമ്മറി കാര്ഡിലെ ദൃശ്യങ്ങള് ലഭിച്ചെങ്കില് മാത്രമേ തന്റെ നിരപരാധിത്വം തെളിയിക്കാനാകൂ എന്നായിരുന്നു ദിലീപിന്റെ വാദം.
മൊബൈല് ഫോണില് പകര്ത്തിയ ആക്രമണ ദൃശ്യങ്ങള് കേസിലെ പ്രധാന രേഖയാണ്. നിയമപരമായി അത് ലഭിക്കാന് അവകാശമുണ്ടെന്നും ദിലീപ് വാദിച്ചിരുന്നു. ദൃശ്യങ്ങള് കൈമാറുന്നിന് ഉപാധികള് വെക്കാമെന്നും ദൃശ്യങ്ങള് ചോരാതിരിക്കാന് വാട്ടര്മാര്ക്കിട്ട് നല്കിയാല് മതിയെന്നും ദിലീപ് അറിയിച്ചിരുന്നു.
അതേസമയം കാര്ഡിലെ ഉള്ളടക്കം അനുവദിക്കുന്നത് തന്റെ സ്വകാര്യതക്ക് മേലുള്ള കയ്യേറ്റമാണെന്ന് കാണിച്ചാണ് നടി കോടതിയെ സമീപിച്ചിരുന്നത്. പ്രതിയെന്ന നിലയില് ദൃശ്യങ്ങള് കാണണമെങ്കില് വിചാരണക്കോടതിയുടെ അനുമതിയോടെ കാണാവുന്നതേയുള്ളൂവെന്നും നടി രേഖാമൂലം കോടതിയെ അറിയിച്ചിരുന്നു.
Discussion about this post