തിരുവനന്തപുരം: സംസ്ഥാനത്ത് ഇന്നും മഴ തുടരുമെന്ന് കാലാവസ്ഥാ നിരീക്ഷണ കേന്ദ്രം. ഈ സാഹചര്യത്തിൽ മൂന്ന് ജില്ലകളിൽ ഇന്ന് യെല്ലോ അലർട്ട് ഏർപ്പെടുത്തി. ദിവസങ്ങളായി കനത്ത മഴ തുടരുന്ന സാഹചര്യത്തിൽ ജനങ്ങൾ ജാഗ്രത പാലിക്കണമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു.
പത്തനംതിട്ട, ഇടുക്കി, എറണാകുളം എന്നീ ജില്ലകളിലാണ് യെല്ലോ അലർട്ടുള്ളത്. ജില്ലകളിൽ 64.5 മുതൽ 115.5 മില്ലീ ലിറ്റർവരെ മഴ ലഭിക്കും. വരും ദിവസങ്ങളിലും സംസ്ഥാനത്ത് മഴ തുടരും. അതിനാൽ നാളെ രണ്ട് ജില്ലയിൽ യെല്ലോ അലർട്ടാണ്. മറ്റെന്നാളോടെ മഴയ്ക്ക് നേരിയ ശമനം ഉണ്ടാകും. അതിനാൽ ഇടുക്കിയിൽ മാത്രമാണ് യെല്ലോ അലർട്ടുള്ളത്.
തെക്ക് കിഴക്കൻ അറബിക്കടലിൽ ചക്രവാതച്ചുഴി നിലനിൽക്കുന്നുണ്ട്. ഇത് നാളെയോടെ ന്യൂനമർദ്ദമായി മാറാൻ സാദ്ധ്യതയുണ്ട്. ഇതോടെ സംസ്ഥാനത്ത് മഴ കൂടുതൽ ശക്തമായേക്കാമെന്നും കാലാവസ്ഥാ നിരീക്ഷണ കേന്ദ്രം അറിയിച്ചു.
മോശം കാലാവസ്ഥയുടെ പശ്ചാത്തലത്തിൽ മത്സ്യത്തൊഴിലാളികൾക്കും തീരമേഖലകളിൽ താമസിക്കുന്നവർക്കും ജാഗ്രതാ നിർദ്ദേശം പുറപ്പെടുവിച്ചിട്ടുണ്ട്. ലക്ഷദ്വീപ് തീരത്ത് മത്സ്യബന്ധനത്തിന് വിലക്കേർപ്പെടുത്തിയിട്ടുണ്ട്. കടൽക്ഷോഭത്തിന്റെ പശ്ചാത്തലത്തിൽ ആവശ്യമെങ്കിൽ മാറിത്താമസിക്കണമെന്ന് അധികൃതർ അറിയിച്ചിട്ടുണ്ട്.
Discussion about this post