കോട്ടയം : കോട്ടയം ഈരാറ്റുപേട്ടയിൽ നിന്നും വൻ കള്ളനോട്ട് ശേഖരം കണ്ടെത്തി. സിഡിഎമ്മിലൂടെ ബാങ്കിൽ നിക്ഷേപിച്ച ലക്ഷങ്ങളുടെ കള്ളനോട്ട് ആണ് പിടികൂടിയത്. ബാങ്ക് അധികൃതർ വിവരം അറിയിച്ചതിനെ തുടർന്ന് പോലീസ് സ്ഥലത്തെത്തി കള്ളനോട്ടുകൾ പിടിച്ചെടുത്തു.
ഈരാറ്റുപേട്ടയിലെ ഫെഡറൽ ബാങ്ക് ശാഖയിലായിരുന്നു സംഭവം നടന്നത്. രണ്ടേകാൽ ലക്ഷം രൂപയുടെ കള്ള നോട്ടുകളാണ് പിടികൂടിയിട്ടുള്ളത്. 500 രൂപയുടെ 448 നോട്ടുകൾ സിഡിഎമ്മിലൂടെ ബാങ്കിൽ നിക്ഷേപിക്കുകയായിരുന്നു. നോട്ടുകൾ കള്ളനോട്ട് ആണെന്ന് തിരിച്ചറിഞ്ഞതോടെ ബാങ്ക് അധികൃതർ പോലീസിൽ വിവരം അറിയിക്കുകയായിരുന്നു.
പോലീസ് നടത്തിയ അന്വേഷണത്തിൽ മൂന്ന് പേരെ കസ്റ്റഡിയിലെടുത്തു. വിശദമായ പരിശോധനയ്ക്കും അന്വേഷണത്തിനും ശേഷം ഇവരുടെ അറസ്റ്റ് രേഖപ്പെടുത്തും എന്നാണ് സൂചന. എവിടെനിന്നാണ് ഇവർക്ക് കള്ളനോട്ട് ലഭിച്ചത് എന്നതിനെക്കുറിച്ചും വിശദമായ അന്വേഷണം നടത്തുമെന്ന് പോലീസ് അറിയിച്ചു.
