ഡല്‍ഹി: ഇസ്രായേല്‍ സന്ദര്‍ശനത്തിനൊരുങ്ങി പ്രധാനമന്ത്രി നരേന്ദ്ര മോദി. ജൂലൈ ആദ്യവാരത്തിലാണ് ചരിത്രത്തിലാദ്യമായി ഇസ്രായേല്‍ മണ്ണിലേക്ക് ഇന്ത്യയുടെ ഒരു പ്രധാനമന്ത്രി സന്ദര്‍ശനം നടത്തുന്നത്. ഇതിനെ ഇരു രാജ്യങ്ങളും ഏറെ ആകാംക്ഷപൂര്‍വ്വമാണ് ഉറ്റു നോക്കുന്നത്. ഇസ്രായേലുമായി മികച്ച സഹകരണ പദ്ധതികള്‍ അവിഷ്‌കരിക്കുന്നതിന്റെ മുന്നോടിയായിട്ടാണ് അദ്ദേഹത്തിന്റെ ഈ സന്ദര്‍ശനമെന്നാണ് മനസിലാക്കേണ്ടത്. മുന്‍ കേന്ദ്ര സര്‍ക്കാര്‍ ഇസ്രായേലുമായി മികച്ച കൂട്ടുകെട്ട് രൂപപ്പെടുത്തിയെടുക്കാന്‍ കഴിഞ്ഞിരുന്നില്ല. ഈ അവസ്ഥയ്ക്ക് മാറ്റം വരുത്തുക എന്ന ലക്ഷ്യമാണ് മോദിക്കുള്ളത്.
കഴിഞ്ഞ ആഴ്ച ഇസ്രായേലില്‍ നടന്ന ദേശീയ ആഘോഷത്തിന് പ്രധാനമന്ത്രി നരേന്ദ്ര മോദി ട്വിറ്ററിലൂടെ ആശംസകള്‍ അറിയിച്ചിരുന്നു. അദ്ദേഹം ആംശസകള്‍ രേഖപ്പെടുത്തിയ ഉടന്‍ തന്നെ ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹു തിരിച്ച് മോദിയോട് നന്ദിയറിക്കുകയും ചെയ്തു. ‘ താങ്കളുടെ ആശംസകള്‍ക്ക് നന്ദി, നിങ്ങളുടെ ഇസ്രായേല്‍ സന്ദര്‍ശനത്തിനായി തന്റെ ജനത കാത്തിരിക്കുകയാണ്’ നെതന്യാഹു ട്വിറ്ററില്‍ കുറിച്ചു.
ജൂലൈയില്‍ മോദി നടത്തുന്ന സന്ദര്‍ശനത്തിലൂടെ ഇരു രാജ്യങ്ങളും തമ്മില്‍ വിവിധ കരാറുകളില്‍ ഒപ്പിടാന്‍ ഏറെ സാധ്യതയുണ്ട്. സാമ്പത്തിക, സൈനിക കരാറുകള്‍ക്ക് പുറമെ ഇന്റലിജന്‍സ് മേഖലകളിലും ഇരു രാജ്യങ്ങളും പുതിയ ഉടമ്പടികള്‍ ഉണ്ടാക്കുമെന്നാണ് കരുതുന്നത്. ഭാരതത്തിന് സൈനിക ഉപകരണങ്ങള്‍ നല്‍കുന്ന രാജ്യങ്ങളില്‍ മുന്‍പന്തിയില്‍ നില്‍ക്കുന്ന രാജ്യങ്ങളിലൊന്നാണ് ഇസ്രായേല്‍. 1.1 ബില്ല്യന്‍ ഡോളറിന്റെ കരാറാണ് ഇവ. കഴിഞ്ഞയാഴ്ച 200 കോടി ഡോളറിന്റെ മിസൈലുകള്‍ ഇന്ത്യക്ക് നല്‍കാനുള്ള കരാറില്‍ ഇസ്രയേല്‍ ഒപ്പുവച്ചിരുന്നു. മോദിയുടെ സന്ദര്‍ശനത്തോടെ രണ്ട് പ്രധാന സൈനിക കരാറുകള്‍ നിലവില്‍ വരും. ഇന്ത്യന്‍ ആര്‍മിക്കായി സ്‌പൈക്ക് ആന്റി ടാങ്ക് മിസൈലും ഇന്ത്യന്‍ നാവിക സേനക്കായി ബാരക്8 എയര്‍ ഡിഫന്‍സ് മിസൈലുമാണ് ഇവയില്‍ പ്രധാനമായിട്ടുള്ളത്.ഇതിനു പുറമെ രണ്ട് വര്‍ഷത്തേക്ക് 8000 മിസൈലുകള്‍ നല്‍കാനും ധാരണയാകും.
ഐക്യരാഷ്ട്രസഭ വേദികളില്‍ നിരവധി തവണ മോദിയും നെതന്യാഹുവും ചര്‍ച്ചകള്‍ നടത്തിയിട്ടുണ്ട്. 2015-ല്‍ പാരീസില്‍ നടന്ന കാലാവസ്ഥ ഉച്ചക്കോടിയില്‍ പങ്കെടുത്തപ്പോള്‍ ഇരു നേതാക്കളും കൂടിക്കാഴ്ച നടത്തിയിരുന്നു. 1992-ല്‍ ആണ് ഇരുരാജ്യങ്ങളും തമ്മിലുള്ള നയതന്ത്രബന്ധം ആരംഭിച്ചത്.
Discussion about this post