ഡല്ഹി: ആം ആദ്മി പാര്ട്ടി കണ്വീനറും ഡല്ഹി മുഖ്യമന്ത്രിയുമായ അരവിന്ദ് കെജ്രിവാളിനെ പരിഹസിച്ച് മുന് മന്ത്രി കപില് മിശ്ര രംഗത്ത്. കെജ്രിവാളിന്റെ പേര് ‘അരവിന്ദ് ഹവാല കെജ്രിവാ’ളെന്ന് മാറ്റണമെന്ന് കപില് മിശ്ര പരിഹസിച്ചു. വിമതസ്വരം ഉയര്ത്തുന്നവരെ പാര്ട്ടിയില് നിന്ന് ഉടന് പുറത്താക്കും. കുമാര് ബിശ്വാസിനെയാണ് അടുത്തതായി ലക്ഷ്യമിട്ടിരുന്നത്. എന്നാല്, നിശബ്ദനായതിനാല് ബിശ്വാസിനെ പാര്ട്ടിയില് നിന്ന് പുറത്താക്കില്ലെന്നും കപില് മിശ്ര വ്യക്തമാക്കി.
വകുപ്പു കൈകാര്യം ചെയ്യുന്നതില് വീഴ്ച വരുത്തിയെന്ന് ആരോപിച്ച് ജലവിഭവ വകുപ്പു മന്ത്രിയായിരുന്ന കപില് മിശ്രയെ മന്ത്രിസഭയില് നിന്ന് കെജ്രിവാള് പുറത്താക്കിയിരുന്നു. ഇതിന് പിന്നാലെയാണ് കെജ്രിവാളിനെതിരെ അഴിമതിയാരോപണുമായി മിശ്ര രംഗത്തെത്തിയത്.
ആരോഗ്യ വകുപ്പ് മന്ത്രിയായ സത്യേന്ദ്ര ജെയിന് കെജ്രിവാളിന് പണം നല്കുന്നത് കണ്ടുവെന്നാണ് കപില് മിശ്ര വെളിപ്പെടുത്തിയത്. എന്തിനാണ് ഈ പണം വാങ്ങിയതെന്ന തന്റെ ചോദ്യത്തിന് കെജ്രിവാള് മറുപടി നല്കിയില്ല. എന്നാല്, രാഷ്ട്രീയത്തില് ഇത്തരം കാര്യങ്ങള് സംഭവിക്കുമെന്നും ഇതിനെ കുറിച്ച് പിന്നീട് സംസാരിക്കാമെന്നും കെജ്രിവാള് അറിയിച്ചുവെന്നും കപില് മിശ്ര പറഞ്ഞിരുന്നു.
കെജ്രിവാള് ബന്ധുവിന്റെ 50 കോടി രൂപയുടെ ഭൂമിയിടപാട് നടത്തികൊടുത്തെന്ന് ജെയിന് പറഞ്ഞതായും മിശ്ര ആരോപണം ഉന്നയിച്ചിരുന്നു. ആം ആദ്മി നേതാക്കളായ സഞ്ജയ് സിങ്ങിന്റെയും അശുതോഷിന്റെയും റഷ്യന് ട്രിപ്പിന് പണം കണ്ടെത്തിയത് എങ്ങനെ എന്ന് കെജ്രിവാള് വിശദീകരിക്കണമെന്നും കപില് മിശ്ര ആവശ്യപ്പെട്ടിരുന്നു.
Discussion about this post