ഡല്‍ഹി : യുപി സര്‍ക്കാര്‍ പുറത്തിറക്കിയ സംസ്ഥാന ടൂറിസം കൈപ്പുസ്തകത്തില്‍ താജ്മഹലില്ല എന്ന വിവാദത്തിന് പിറകെ പോയവര്‍ക്ക് തിരിച്ചടി. വിവാദം അനാവശ്യമായി സൃഷ്ടിച്ചതെന്ന വിശദീകരണവുമായി യുപി സര്‍ക്കാര്‍ രംഗത്തെത്തി. യുപി സര്‍ക്കാരിന്റെ ടൂറിസം പദ്ധതികളാണ് കൈപുസ്തകത്തിലുള്ളത്. താജ്മഹല്‍ രാജ്യാന്തര സ്മാരകമാണ്. കൈപ്പുസ്തകത്തിലെ വിവരങ്ങള്‍ സംസ്ഥാന തല ടൂറിസം പദ്ധതികളുമായി ബന്ധപ്പെട്ടുള്ളതാണെന്നും യുപി ടൂറിസം മന്ത്രി റീത ബഹുഗുണ ജോഷി പറഞ്ഞു. ടൂറിസം പദ്ധതികള്‍ക്കുള്ള 370 കോടി രൂപയില്‍ 156 കോടിയും താജ്മഹലിലാണ് നീക്കിവച്ചത്. അതിനാലാണ് സംസ്ഥാന പദ്ധതികളില്‍ താജ്മഹല്‍ ഉള്‍പ്പെടുത്താതിരുന്നത് എന്നും അദ്ദേഹം വിശദീകരിക്കുന്നു.
‘ഉത്തര്‍പ്രദേശ്-താജിന്റെ ഭവനം’. കൈപ്പുസ്തകത്തിലെ വിവരങ്ങള്‍ സംസ്ഥാന പദ്ധതികളാണ്, താജ്മഹല്‍ രാജ്യാന്തര സ്മാരകമാണ് എന്നിങ്ങനെ മുഖ്യമന്ത്രി യോഗി ആദിത്യനാഥ് ട്വീറ്റ് ചെയ്തു.
ഇതോടെ കൈപുസ്തകത്തിലെ താജ് മഹലിനെ ഒഴിവാക്കിയത് വര്‍ഗ്ഗീയമാണെന്ന എഐസിസി ഉപാധ്യക്ഷന്‍ രാഹുല്‍ ഗാന്ധി ഉള്‍പ്പടെയുള്ള കോണ്‍ഗ്രസ് നേതാക്കളുടെ വാദം പൊളിഞ്ഞു. താജ്മഹല്‍ ഇന്ത്യന്‍ സംസ്‌കാരത്തിന്റെ ഭാഗമല്ല’ എന്ന് മുഖ്യമന്ത്രി യോഗി ആദിത്യനാഥ് ബിഹാറിലെ ദര്‍ഭംഗയില്‍ മൂന്നുമാസം മുന്‍പു പറഞ്ഞിരുന്നത് ഉയര്‍ത്തികാട്ടിയാണ് വിവാദത്തിന് പ്രതിപക്ഷം വഴിമരുന്നിട്ടത്.
യുപിയിലെ സാംസ്‌കാരിക കേന്ദ്രങ്ങളും ക്ഷേത്രങ്ങളുമാണ് കൈപ്പുസ്തകത്തില്‍ ഉള്ളത്. ഗോരഖ്പുരിനു പുറമെ, മഥുര, അയോധ്യ, വാരാണസി തുടങ്ങിയ സ്ഥലങ്ങളിലെ പ്രസിദ്ധ ക്ഷേത്രങ്ങളുടെ വിവരങ്ങളും ടൂറിസം കൈപ്പുസ്തകത്തിലുണ്ട്.
Discussion about this post