ചെന്നൈ: ഗവര്ണറുടെ ഔദ്യോഗിക വസതിയായ രാജ്ഭവനില് സസ്യേതര ഭക്ഷണം പാടില്ലെന്ന് തമിഴ്നാട് ഗവര്ണര് ബന്വാരിലാല് പുരോഹിതിന്റെ ഉത്തരവ്. മുട്ടയ്ക്കുപോലും വിലക്കുണ്ട്. സസ്യേതര ഭക്ഷണം കഴിക്കാന് ആഗ്രഹിക്കുന്നവര്ക്ക് പുറത്തുപോയി കഴിക്കാമെന്നും ഗവര്ണര് നിര്ദേശിച്ചതായി രാജ്ഭവന് വൃത്തങ്ങള് അറിയിച്ചു.
രാജ്ഭവനില് നേരത്തേ താമസിച്ചിരുന്ന ഗവര്ണര്മാര് നടപ്പാക്കാത്ത കീഴ്വഴക്കങ്ങളാണ് ബന്വാരിലാല് പുരോഹിത് നടപ്പാക്കിക്കൊണ്ടിരിക്കുന്നതെന്ന് പരാതിയുണ്ട്. ഒക്ടോബര് ആറിനാണ് അദ്ദേഹം ചുമതലയേറ്റത്. പിന്നാലെ പുതിയ കീഴ്വഴക്കങ്ങളും നടപ്പാക്കിത്തുടങ്ങി.
കോയമ്ബത്തൂരില് സര്ക്കാര് ഉന്നതോദ്യോഗസ്ഥരുമായി ഗവര്ണര് നടത്തിയ യോഗം വിവാദമായിരുന്നു. സര്ക്കാരിന്റെ അധികാരപരിധിയില് ഗവര്ണര് അനാവശ്യമായി തലയിടുകയാണെന്നായിരുന്നു ആരോപണം. ഗവര്ണറുടെ നടപടികള്ക്കെതിരേ ഡി.എം.കെ. രംഗത്തെത്തിയിട്ടുണ്ട്. മുഖ്യമന്ത്രി എടപ്പാടി പളനിസ്വാമിയുടെ നേതൃത്വത്തിലുള്ള എ.ഐ.എ.ഡി.എം.കെ. സര്ക്കാരിനെയും ഇത് നീരസത്തിലാക്കിയിട്ടുണ്ട്. അതേസമയം, തമിഴ്നാട് ബി.ജെ.പി.നേതൃത്വം ഗവര്ണറുടെ നടപടിയെ പ്രശംസിച്ചുകൊണ്ട് രംഗത്തെത്തി.
Discussion about this post