മുത്തലാഖ് ചൊല്ലുന്നവര്‍ക്ക് മൂന്നുവര്‍ഷത്തെ തടവ് ശിക്ഷ ശുപാര്‍ശ ചെയ്യുന്ന ബില്‍ ഇന്ന് ലോക്‌സഭയില്‍ അവതരിപ്പിക്കും. ഒറ്റയടിക്കുള്ള തലാഖ് ക്രിമിനല്‍ കുറ്റമാക്കാനും ബില്ലില്‍ വ്യവസ്ഥയുണ്ട്. ബില്‍ നടപ്പുസമ്മേളനത്തില്‍ പാസാക്കാന്‍ സാധ്യതയില്ല. കൂടുതല്‍ ചര്‍ച്ചകള്‍ക്കും പരിശോധനയ്ക്കുമായി അത് പാര്‍ലമെന്ററി സമിതിയുടെ പരിഗണനയ്ക്ക് വിടും. മുത്തലാഖിന് ഇരയായ സ്ത്രീയ്ക്ക് ജീവനാംശത്തിനും ബില്ലില്‍ വ്യവസ്ഥ ചെയ്തിട്ടുണ്ട്. കോണ്‍ഗ്രസും, സിപിഎമ്മും ബില്ലിനെ എതിര്‍ക്കുകയാണ്.
ബില്ലിന്‍മേല്‍ കൂടുതല്‍ ചര്‍ച്ച വേണമെന്നാണ് പൊതുവായ ആവശ്യം. കരടുബില്‍ തയ്യാറാക്കുന്നതിനുമുമ്പ് സര്‍ക്കാര്‍ ആരുമായും കൂടിയാലോചന നടത്തിയിട്ടുമില്ല. അതേസമയം, മുത്തലാഖിനെ ഈ പാര്‍ട്ടികളൊന്നും ന്യായീകരിച്ചിട്ടില്ലെന്നതും ശ്രദ്ധേയമാണ്.
മുത്തലാഖ് ബില്ലിനെതിരേ മുസ്ലിം വ്യക്തിനിയമ ബോര്‍ഡും വിവിധ സംഘടനകളും രംഗത്തിറങ്ങിയിട്ടുണ്ട്. ബില്ലിനെ പാര്‍ലമെന്റിലും പുറത്തും എതിര്‍ക്കാന്‍ മുസ്ലിം ലീഗിന്റെ ദേശീയ നേതൃയോഗം വ്യാഴാഴ്ച തീരുമാനിച്ചു.
എന്നാല്‍ ലഖ്‌നൗ ആസ്ഥാനമായ ‘ഓള്‍ ഇന്ത്യ മുസ്ലിം വനിതാ പേഴ്‌സണല്‍ ലോ ബോര്‍ഡ്’ മുത്തലാഖ് ബില്ലിനെ സ്വാഗതം ചെയ്തു. ബില്‍ എത്രയും വേഗം പാസാക്കണമെന്ന് സംഘടനയുടെ പ്രസിഡന്റ് ഷയ്‌സ്ത അംബര്‍ പറഞ്ഞു. മുസ്ലിം വനിതകള്‍ക്കെതിരായ നിലപാടാണ് മുസ്ലിം പേഴ്‌സണല്‍ ലോ ബോര്‍ഡ് കൈക്കൊള്ളുന്നതെന്ന് അവര്‍ ആരോപിച്ചു.
Discussion about this post