ശബരിമലയില്‍ യുവതികള്‍ക്ക് പ്രവേശനം അനുവദിച്ചിരിക്കുന്ന സാഹചര്യത്തില്‍ അവിടേക്ക് വരുന്ന ഏതൊരു യുവതിക്കും പ്രവേശനം അനുവദിക്കുക എന്നതാണ് സര്‍ക്കാരിന്റെ നിലപാടെന്ന് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍. വരുന്നത് ആക്ടിവിസ്റ്റാണോ അല്ലയോ എന്ന് നോക്കി പ്രവേശനത്തിന് വേണ്ട സംരക്ഷണം നല്‍കുക എന്ന നിലപാട് സര്‍ക്കാരിനില്ലെന്നും അദ്ദേഹം പറഞ്ഞു.
എന്നാല്‍ ആക്ടിവിസ്റ്റുകള്‍ക്ക് സംരക്ഷണം നല്‍കേണ്ട ഉത്തരവാദിത്തം സര്‍ക്കാരിനില്ലെന്ന അഭിപ്രായമാണ് ദേവസ്വം മന്ത്രി കടകംപള്ളി സുരേന്ദ്രന്‍ നേരത്തെ എടുത്തത്.
അതേസമയം ശബരിമലയില്‍ നടന്നത് കലാപത്തിനുള്ള ശ്രമമാണെന്നും ഇതിന് പിന്നില്‍ ആര്‍.എസ്.എസ് ആണെന്നും കോടിയേരി പറഞ്ഞു. ശബരിമലയില്‍ നടന്ന കാര്യങ്ങള്‍ പൊതുജനങ്ങളെ പറഞ്ഞ് മനസ്സിലാക്കാന്‍ വേണ്ടി നവംബര്‍ 3, 4 എന്നീ തീയ്യതികളില്‍ ഗൃഹസന്ദര്‍ശന പരിപാടി നടത്തുമെന്നും കോടിയേരി പറഞ്ഞു. വീടുകള്‍ തോറും കയറി വിശദീകരണം നല്‍കാനാണ് സി.പി.എമ്മിന്റെ പദ്ധതി. ഇത് കൂടാതെ വിവിധ ജില്ലകളില്‍ റാലികള്‍ നടത്താനും സി.പി.എമ്മിന് പദ്ധതിയുണ്ടെന്ന് കോടിയേരി അറിയിച്ചു.
Discussion about this post