ഡല്‍ഹി: നാഗാ തീവ്രവാദികള്‍ക്കെതിരേ കേന്ദ്രം സൈനികനീക്കം പരിഗണിക്കുന്നു. മണിപ്പൂരില്‍ നടന്ന ഭീകരാക്രമണത്തിന്റെ പശ്ചാത്തലത്തില്‍ ആണ് സൈനിക നീക്കം പരിഗണിക്കുന്നത്.മണിപ്പൂരില്‍ സൈനിക വാഹനവ്യൂഹത്തിനുനേരേ ഭീകരര്‍ നടത്തിയ ഒളിയാക്രമണത്തില്‍ ഇരുപതു സൈനികരാണ് കൊല്ലപ്പെട്ടത്.
ഇന്നലെ രാവിലെ മാ്യന്‍മാര്‍ അതിര്‍ത്തിക്ക് 1520 കിലോമീറ്റര്‍ അടുത്ത് പാരാലോഗ്, ചാരോങ് ഗ്രാമങ്ങള്‍ക്കു നടുവില്‍ എത്തിയപ്പോഴായിരുന്നു ആക്രമണം. ഗ്രനേഡുകളും കുഴിബോംബുകളും അത്യാധുനിക ആയുധങ്ങളും ഉപയോഗിച്ചായിരുന്നു ആക്രമണം. ഇംഫാലില്‍നിന്ന് എണ്‍പതു കിലോമീറ്റര്‍ അകലെ തെങ്‌നൗപ്പാല്‍ ന്യൂ സംതല്‍ റോഡില്‍ പട്രോളിങ് നടത്തുന്നതിനിടെ 6 ദോഗ്ര റെജിമെന്റ് അംഗങ്ങള്‍ക്കു നേരേയാണ് ഭീകരര്‍ തലങ്ങും വിലങ്ങും ആക്രമണം നടത്തിയത്. സൈനിക വാഹനത്തിനുനേരേ സ്‌ഫോടനം നടത്തിയ സംഘം ശക്തമായ വെടിവയ്പും ഗ്രനേഡ് ആക്രമണവും നടത്തി.
ആക്രമണം നടന്ന് മണിക്കൂറുകള്‍ക്കകം കേന്ദ്ര ആഭ്യന്തര മന്ത്രി രാജ്‌നാഥ് സിങ്ങ്, പ്രതിരോധമന്ത്രി മനോഹര്‍ പരീഖര്‍, സുരക്ഷാ ഉപദേശകന്‍ ഡോവല്‍, സൈനിക തലവന്‍ ജനറല്‍ ദല്‍ബീര്‍ സിംഗ് സുഹാഗ് മറ്റ് സീനിയര്‍ ഉദ്യോഗസ്ഥര്‍ എന്നിവര്‍ യോഗം ചേര്‍ന്നിരുന്നു. എന്‍ഡിഎ ഭരണത്തിന് കീഴില്‍ നടക്കുന്ന ഏറ്റവും വലിയ തീവ്രവാദി ആക്രമണമായിരുന്നു നടന്നത്. അര്‍ദ്ധസൈനിക വിഭാഗത്തെ ഉപയോഗിച്ച് ബോഡോലാന്റ് തീവ്രവാദികളെ ഒതുക്കാന്‍ മാസങ്ങള്‍ക്ക് മുമ്പ് നടത്തിയ അതേ രീതിയിലുള്ള തിരിച്ചടിയാണ് കേന്ദ്രം ആലോചിക്കുന്നത്.
മാര്‍ച്ചില്‍ എന്‍സിസിഎന്‍ (കെ) യുമായി വെടിനിര്‍ത്തല്‍ പ്രഖ്യാപിച്ച ശേഷം ആഴ്ചകളായി രാജ്യത്തിന്റെ വടക്കുകിഴക്കന്‍ മേഖലകളില്‍ ശക്തമായ ശല്യമാണ് നേരിടുന്നത്. ഛന്ദേല്‍ ജില്ലയിലുണ്ടായ ആക്രമണത്തിനു പിന്നില്‍ നാഗാ തീവ്രവാദികള്‍ എന്‍എസ് സി എന്‍(കെ) പീപ്പിള്‍സ് ലിബറേഷന്‍ ആര്‍മിയും(പി.എല്‍.എ) കാഗ്ലേ യാവോള്‍ ഖന്ന ലൂപ്പും (കെ.വൈ.കെ.എല്‍) ആണെന്നാണു സംശയം.
Discussion about this post