ശബരിമലയില്‍ ദേവസ്വം ബോര്‍ഡ് മകരവിളക്ക് കത്തിക്കുന്നത് ആചാരലംഘനമാണെന്ന് മലയരയ മഹാസഭ ജനറല്‍ സെക്രട്ടറി പി.കെ.സജീവ് അഭിപ്രായപ്പെട്ടു. മകരവിളക്ക് ദിനമായ ഇന്ന് പതിനായിരം കുടുംബങ്ങള്‍ അവകാശ പുനസ്ഥാപന ദീപം തെളിയിക്കുമെന്നും അദ്ദേഹം അറിയിച്ചു.
1950 വരെ മലയരയന്മാരായിരുന്നു മകരവിളക്ക് കത്തിച്ചിരുന്നതെന്നും അത് കഴിഞ്ഞപ്പോള്‍ മലയരയര്‍ക്ക് പൊന്നമ്പലമേട്ടിലേക്കുള്ള പ്രവേശനം നിഷേധിക്കുകയായിരുന്നുവെന്ന് പി.കെ.സജീവ് പറഞ്ഞു. ഇതിന് ശേഷം 2014ല്‍ ദീപവുമായി ചെന്ന അവരെ പോലീസ് തടഞ്ഞിരുന്നുവെന്നും അന്നത്തെ ദീപം കെടാവിളക്കായി സൂക്ഷിച്ചിട്ടുണ്ടെന്നും അദ്ദേഹം ചൂണ്ടിക്കാട്ടി.
പൊന്നമ്പലമേട്ടില്‍ അവസാനമായി ദീപം തെളിയിച്ച പുത്തന്‍വീട്ടില്‍ കുഞ്ഞന്റെ മരുമകള്‍ രാജമ്മ അയ്യപ്പന്റെ കുടുംബത്തിലേക്ക് പി.കെ.സജീവ് ആദ്യത്തെ ദീപം പകരുന്നതായിരിക്കും. മലയരയര്‍ക്ക് ഐക്യദാര്‍ഡ്യം പ്രഖ്യാപിച്ച് തിരിവപ്പൂപ്പന്‍ നീതി പരിപാലന ട്രസ്റ്റ് എന്ന സംഘടനയും മുന്നോട്ട് വന്നിട്ടുണ്ട്. കുറവര്‍ സമുദായത്തിന്റെ ആരാധനാ കേന്ദ്രമായ കല്ലുമണ്‍മലനടയില്‍ വിളക്ക് തെളിയിക്കുമെന്നും ട്രസ്റ്റ് അറിയിച്ചു.
അതേസമയം പതിനെട്ട് പടികളെ പ്രതിനിധീകരിച്ച് മലയരയര്‍ പതിനെട്ട് വിളക്കുകള്‍ എന്ന് പറയാറുണ്ടെന്നും ഇത് അറിയാതെയാണ് ചിലര്‍ ഈ വാക്കുകള്‍ ഉപയോഗിക്കുന്നതെന്നും പി.കെ.സജീവ് പറഞ്ഞു. എങ്കിലും ജനങ്ങളിലേക്ക് തങ്ങളുടെ ആചാരങ്ങളെ കുറിച്ച് അറിയിക്കാന്‍ കഴിയുമെന്നുള്ളത് കൊണ്ട് ഇതൊക്കെ അനുകൂലമായി കാണുന്നുവെന്നും പി.കെ സജീവ് പറഞ്ഞു.
Discussion about this post