നോട്ട് നിരോധനത്തെ തുടര്‍ന്ന് കള്ളപ്പണം വ്യാപകമായി വെളുപ്പിച്ചവരെ പിടികൂടാന്‍ കേന്ദ്ര പ്രത്യക്ഷനികുതി ബോര്ഡ് ആദായവകുപ്പ് ഉദ്യോഗസ്ഥര്‍ക്ക് നിര്‍ദേശം നല്‍കി. കള്ളപ്പണം വെളുപ്പിച്ചെന്ന് കരുതുന്ന ഏകദേശം മൂന്ന് ലക്ഷത്തോളം കമ്പനികളുടെ ഇടപാടുകളാണ് പരിശോധിക്കുന്നത്. 2016 നവംബര്‍ എട്ടിനാണ് പ്രധാനമന്ത്രി രാജ്യത്തോട് അഭിസംബോധന ചെയ്തുകൊണ്ട് 1000,500 രൂപ കറന്‍സികള്‍ നിരോധിച്ചത്. എന്നാല്‍ ഇതിനടുത്ത ദിവസങ്ങളില്‍ രാജ്യത്തെ ലക്ഷക്കണക്കിന് കമ്പനികള്‍ പതിനായിരം കോടി രൂപയുടെ കള്ളപ്പണം വെളുപ്പിച്ചിട്ടുണ്ടെന്നാണ് കണ്ടെത്തിയിട്ടുള്ളത്. ഈ കമ്പനികളുടെ ബാങ്ക് അക്കൗണ്ടുകളില്‍നിന്ന് പണം പിന്‍വലിച്ചതും നിക്ഷേപിച്ചതുമാണ് പരിശോധിക്കുക.
കടലാസില്‍ മാത്രം പ്രവര്‍ത്തിക്കുന്ന കമ്പനികളാണ് ഇത്തരത്തില്‍ കള്ളപ്പണം വെളുപ്പിച്ചിട്ടുണ്ടെന്ന് കരുതുന്നത്. കള്ളപ്പണം വെളുപ്പിക്കാന്‍ പലരും ഇത്തരം സ്ഥാപനങ്ങളെ ഉപയോഗപ്പെടുത്തിയതായും സംശയമുണ്ട്. നോട്ടുനിരോധന ദിവസത്തിനുമുമ്പുവരെ ചെറിയ തുകമാത്രമുണ്ടായിരുന്ന അക്കൗണ്ടുകളില്‍ പിന്നീട് വലിയ ഇടപാടുകള്‍ നടന്നതായും കണ്ടെത്തിയിരുന്നു. നോട്ട് നിരോധനം കഴിഞ്ഞ് വര്‍ഷം രണ്ട് കഴിഞ്ഞിട്ടും അതിന്‍മേലുള്ള നടപടികള്‍ തുടരുകയാണ്. രാജ്യത്ത് നിരോധിച്ച നോട്ടുകളുടെ മൂല്യത്തിന് ഏതാണ്ട് അടുത്തുതന്നെ തിരികെ എത്തിയതായി റിസര്‍വ് ബാങ്ക് കണക്കുകളില്‍ വ്യക്തമായിരുന്നു.
Discussion about this post