ബുര്‍ഖ ധരിച്ച് വോട്ട് ചെയ്യാനെത്തുന്നവരുടെ മുഖം പരിശോധിക്കണം, ഇല്ലെങ്കില്‍ റീപോള്‍ ആവശ്യപ്പെടുമെന്ന് ബി.ജെ.പി സ്ഥാനാര്‍ത്ഥിയും കേന്ദ്രമന്ത്രിയുമായ ഡോ. സഞ്ജീവ് ബാല്യണ്‍

ബുര്‍ഖ ധരിച്ച് വോട്ടു ചെയ്യാനെത്തുന്ന വോട്ടര്‍മാരുടെ മുഖം പരിശോധിക്കണമെന്ന് മുസാഫിര്‍ നഗറിലെ ബി.ജെ.പി സ്ഥാനാര്‍ത്ഥിയും കേന്ദ്രമന്ത്രിയുമായ ഡോ. സഞ്ജീവ് ബാല്യണ്‍. മുഖം പരിശോധിച്ചില്ലെങ്കില്‍ താന്‍ റീ പോള്‍ ആവശ്യപ്പെടുമെന്നും അദ്ദേഹം മുന്നറിയിപ്പു നല്‍കി.

‘ബുര്‍ഖ ധരിച്ച സ്ത്രീകളുടെ മുഖം പരിശോധിക്കുന്നില്ല. കള്ള വോട്ട് ചെയ്യുന്നുണ്ടെന്നാണ് എന്റെ ആരോപണം.’ എന്നും അദ്ദേഹം പറഞ്ഞു.

പതിനേഴാം ലോക്സഭ തിരഞ്ഞെടുപ്പിന്റെ ആദ്യഘട്ട വോട്ടെടുപ്പ് പുരോഗമിക്കുന്നു. കനത്ത സുരക്ഷയില്‍ സമാധാനപരമായാണ് വോട്ടെടുപ്പ് തുടരുന്നത്. 18 സംസ്ഥാനങ്ങളിലും രണ്ട് കേന്ദ്രഭരണ പ്രദേശങ്ങളിലുമായി 91 ലോക്സഭാ മണ്ഡലങ്ങളിലാണ് വോട്ടെടുപ്പ് നടക്കുന്നത്. രാവിലെ ഏഴു മണി മുതല്‍ വോട്ടെടുപ്പ് തുടങ്ങി.ആന്ധ്രപ്രദേശ്, അരുണാചല്‍ പ്രദേശ്, മേഘാലയ, മിസോറം, നാഗാലാന്റ്, സിക്കിം, തെലങ്കാന, ഉത്തരാഖണ്ഡ് എന്നീ സംസ്ഥാനങ്ങളിലെ മുഴുവന്‍ ലോക്സഭ മണ്ഡലങ്ങളിലേക്കും ആദ്യഘട്ടത്തിലാണ് വോട്ടെടുപ്പ് നടക്കുന്നത്.

ആന്‍ഡമാന്‍ ആന്റ് നിക്കോബാര്‍, ലക്ഷദ്വീപ് എന്നീ കേന്ദ്രഭരണ പ്രദേശങ്ങളിലെ ലോക്സഭാ മണ്ഡലങ്ങളിലും വോട്ടെടുപ്പ് നടക്കുന്നു്. ആന്ധ്രാപ്രദേശ്, സിക്കിം, അരുണാചല്‍ പ്രദേശ് എന്നിവിടങ്ങളിലെ നിയമസഭ തിരഞ്ഞെടുപ്പിലെ വോട്ടെടുപ്പും ഇന്നാണ്.നിതില്‍ ഗഡ്കരി, ബി.ജെ.പി. രേണുകാ ചൗധരി, കോണ്‍ഗ്രസ്, അസസുദീന്‍ ഒവൈസി, മജ്ലിസ് പാര്‍ട്ടി. ഹൈദരാബാദ് (തെലങ്കാന), വി.കെ. സിങ്., ബി.ജെ.പി. കിരണ്‍ റിജിജു, ബി.ജെ.പി.തുടങ്ങിയ നേതാക്കള്‍ മത്സരിക്കുന്ന മണ്ഡലങ്ങളും ആദ്യഘട്ട വോട്ടെടുപ്പിലാണ്.

ആന്ധ്രാപ്രദേശ് (25), തെലങ്കാന (17), ഉത്തര്‍പ്രദേശ് (8), മഹാരാഷ്ട്ര (7), അസം (5), ഉത്തരാഖണ്ഡ് (5), ബിഹാര്‍ (4), ഒഡിഷ (4), അരുണാചല്‍പ്രദേശ് (2), പശ്ചിമ ബംഗാള്‍ (2), ജമ്മുകശ്മീര്‍ (2), മേഘാലയ (2), ഛത്തീസ്ഗഢ് (1), മണിപ്പൂര്‍ (1), മിസോറം (1), നാഗാലാന്‍ഡ് (1), സിക്കിം (1), ത്രിപുര (1), അന്തമാന്‍ നിക്കോബര്‍ (1), ലക്ഷദ്വീപ് (1).-എന്നിങ്ങനെയാണ് ലോകസഭ മണ്ഡലങ്ങളുടെ എണ്ണം. കൂടാതെ ആന്ധ്രാപ്രദേശ്, അരുണാചല്‍പ്രദേശ്, സിക്കീം എന്നിവിടങ്ങളിലെ മുഴുവന്‍ നിയമസഭ മണ്ഡലങ്ങളിലും വോട്ടെടുപ്പ് നടക്കുന്നു.