ശ്രീലങ്കന്‍ സ്ഫോടനവുമായി ബന്ധമുള്ള ഒരാളെ കൊച്ചിയില്‍ നിന്നും എന്‍ ഐ എ പിടികൂടി. ഇടപ്പള്ളി പള്ളിക്കു സമീപത്തുനിന്ന് ബുധനാഴ്ച രാത്രിയിലാണ് ഇയാളെ അറസ്റ്റു ചെയ്തത്. തമിഴ് വംശജനായ ആള്‍ രക്ഷപെടാന്‍ ശ്രമിച്ചെങ്കിലും എന്‍ ഐ എ സംഘം തോക്കുചൂണ്ടി കീഴ്‌പ്പെടുത്തുകയായിരുന്നു. കൂടുതല്‍ വിവരങ്ങള്‍ പുറത്തു വിട്ടിട്ടില്ല.
ഇന്ത്യയില്‍ ഇതുവരെ 155 ഓളം ഐ എസ് ഭീകരന്മാരെയും, അനുഭാവികളെയും തിരിച്ചറിയുകയും ,അറസ്റ്റ് ചെയ്യുകയും ചെയ്തതായി കേന്ദ്ര ആഭ്യന്തര മന്ത്രാലയം അറിയിച്ചിരുന്നു.അറസ്റ്റിലായവരില്‍ ഐ എസിന്റെ ഉപസംഘടനയില്‍പ്പെട്ടവരുമുണ്ടെന്നും, രാജ്യത്ത് പലയിടങ്ങളിലും ഇവര്‍ ഭീകരാക്രമണം നടത്താന് ആസൂത്രണം ചെയ്തിരുന്നതായും ആഭ്യന്തര മന്ത്രാലയം വെളിപ്പെടുത്തി.
കേരളമടക്കമുള്ള സംസ്ഥാനങ്ങളില്‍ നിന്ന് ഐ എസില്‍ ചേരാനായി യുവാക്കള്‍ പോയിട്ടുണ്ട്. ഇതു സംബന്ധിച്ച് കേന്ദ്ര, സംസ്ഥാന ഏജന്‍സികള്‍ അന്വേഷണം നടത്തുന്നുണ്ട്. കേരളത്തില്‍ നിന്ന് ഐ എസില്‍ ചേരാനായി പോയ യുവാക്കള്‍ അഫ്ഗാനില്‍ വച്ച് അമേരിക്കന്‍ സൈന്യത്തിന്റെ ആക്രമണത്തില്‍ കൊല്ലപ്പെട്ടത് സര്‍ക്കാര്‍ ഗൗരവമായാണ് കാണുന്നത്. അതുകൊണ്ട് തന്നെ കേരളം ദേശീയ അന്വേഷണ വിഭാഗത്തിന്റെ പ്രത്യേക അന്വേഷണ വലയത്തിലാണ്.
Discussion about this post