റോഡിലെ കുഴി കണ്ട് കലിയിളകി: എഞ്ചിനീയറെ കെട്ടിയിട്ട് ചെളി കോരി ഒഴിച്ച് കോണ്‍ഗ്രസ് എംഎല്‍എ-വീഡിയൊ പുറത്തായതോടെ വെട്ടിലായി

മഴക്കാലമായാല്‍ റോഡില്‍ കുഴികള്‍ സാധാരണമാണ്.റോഡിനെ പഴിക്കുന്നവരും അധികൃതരെ പഴിക്കുന്നവരും ഉണ്ടാവാറുണ്ട്.എന്നാല്‍ റോഡിലെ കുഴികണ്ടപ്പോള്‍ ക്ഷുഭിതരായി എഞ്ചിനിയറെ കൈയ്യേറ്റം ചെയ്ത് എംഎല്‍എയും അനുയായികളും.മുംബൈയിലാണ് സംഭവം.

എംഎല്‍എ ദേശീയപാതയ്ക്ക് സമീപമുള്ള കന്‍കവാലിക്ക് സമീപം ഒരു പരിപാടിയില്‍ പങ്കെടുക്കാനെത്തിയപ്പോഴാണ് റോഡിലെ കുഴികള്‍ കണ്ടത്. മുന്‍ മുഖ്യമന്ത്രി നാരായണ്‍ റാണെയുടെ മകനും കോണ്‍ഗ്രസ് എംഎല്‍എയുമായ നിതീഷ് നാരായണ്‍ റാണെയുടെ നേതൃത്വത്തിലാണ് എന്‍ജിനിയര്‍ക്ക് നേരെ കയ്യേറ്റം നടത്തിയത്.എന്‍ജിനിയര്‍ക്ക് നേരെ നടത്തുന്ന കയ്യറ്റങ്ങളുടെ വീഡിയോ എംഎല്‍എ തന്റെ ഫെയ്‌സ്ബുക്ക് പോസ്റ്റില്‍ ഷെയര്‍ ചെയ്തതോടെയാണ് സംഭവം വിവാദമായത്.

#WATCH: Congress MLA Nitesh Narayan Rane and his supporters throw mud on engineer Prakash Shedekar at a bridge near Mumbai-Goa highway in Kankavali, when they were inspecting the potholes-ridden highway. They later tied him to the bridge over the river. pic.twitter.com/B1XJZ6Yu6z

— ANI (@ANI) July 4, 2019

റോഡിലെ കുഴികള്‍ കണ്ടപ്പോള്‍ എംഎല്‍എ എന്‍ജിനിയറെ വിളിച്ചുവരുത്തി. അനുയായികള്‍ നോക്കി നില്‍ക്കെ എംഎല്‍എ എന്‍ജിനിയറോട് മോശമായി സംസാരിക്കുകയും പ്രവര്‍ത്തകര്‍ക്കൊപ്പം ചേര്‍ന്ന് ബക്കറ്റില്‍ ചളിവെള്ളമെടുത്ത് എന്‍ജിനിയറുടെ മേല്‍ ഒഴിക്കുകയും ചെയ്തു. ഇതിന് പിന്നാലെ ഹൈവേക്ക് സമീപത്തെ പാലത്തില്‍ എന്‍ജിനിയറെ കെട്ടിയിടുകയും ചെയ്തു.

എംഎല്‍എയുടെ നടപടിയില്‍ വ്യാപകപ്രതിഷേധമാണുയരുന്നത്. കഴിഞ്ഞ ദിവസം മുംബൈയിലെ നഗരസഭ ഉദ്യോഗസ്ഥനെ ബിജെപി എംഎല്‍എ ക്രിക്കറ്റ് ബാറ്റ് കൊണ്ട് അടിച്ചോടിച്ചത് ഏറെ വിവാദമായിരുന്നു. അതിന് പിന്നാലെയാണ് മറ്റൊരു എംഎല്‍എയുടെ നേതൃത്വത്തില്‍ എന്‍ജീനിയര്‍ക്ക് നേരെ കയ്യേറ്റമുണ്ടായത്.