2014നു മുന്പുള്ള കേന്ദ്രഗവണ്മെന്റുകളും റിസര്വ് ബാങ്ക് ഗവര്ണര്മാരുമാണ് ബാങ്കുകളിലെ കിട്ടാക്കടത്തിനും ഇന്ത്യയുടെ സാമ്പത്തികസ്ഥിതിയില് വേണ്ടത്ര കുതിപ്പുണ്ടാകാഞ്ഞതിനും പ്രധാനകാരണമെന്ന് മുന് റിസര്വ് ബാങ്ക് ഗവര്ണര് ഊര്ജിത് പട്ടേല്. കഴിഞ്ഞ വര്ഷം റിസര്വ് ബാങ്ക് ഗവര്ണര് സ്ഥാനത്തുനിന്ന് രാജിവച്ചശേഷം ആദ്യമായി പങ്കെടുത്ത പൊതുചടങ്ങില് വച്ചാണ് മുന് റിസര്വ് ബാങ്ക് ഗവര്ണര് ഈ ഗുരുതരമായ ആരോപണം നടത്തിയത്.
അമേരിക്കയിലെ പ്രശസ്തമായ സ്റ്റാന്ഫോഡ് യൂണിവേഴ്സിറ്റിയില് വച്ചു നടത്തിയ സെമിനാറിലാണ് ഇന്ത്യന് സമ്പദ് വ്യവസ്ഥയെപ്പറ്റി ഊര്ജ്ജിത് പട്ടേല് സംസാരിച്ചത്. ഇന്ത്യയില് ബാങ്കുകള്ക്ക് എങ്ങനെയാണ് ഇത്രയും കിട്ടാക്കടമുണ്ടായതെന്നും സമ്പദ് വ്യവസ്ഥയില് എന്തൊക്കെയാണ് കുഴപ്പങ്ങളുണ്ടായിരുന്നതെന്നും കണക്കുകളും വസ്തുതകളും നിരത്തി ഊര്ജിത് പട്ടേല് വിശദമാക്കി.
2014നു മുന്പ് പൊതുമേഖലാ ബാങ്കുകള് വായ്പകള് നല്കുന്നതിന് ആവശ്യത്തിന് അപകടസാദ്ധ്യതാ മാനദണ്ഡങ്ങള് പാലിച്ചിരുന്നില്ലെന്നും വേണ്ടത്ര മുന്കരുതലുകളെടുത്തിരുന്നില്ലെന്നും പട്ടേല് വ്യക്തമാക്കി. എന്നാല് ബാങ്കുകളെ നിയന്ത്രിച്ചിരുന്ന സ്ഥാപനങ്ങള് കിട്ടാക്കടങ്ങള് തിര്കെക്കിട്ടാന് വേണ്ടത്ര നടപടികള് സ്വീകരിയ്ക്കുകയും ചെയ്തില്ല. മന്മോഹന് സിംഗ് നേതൃത്വം നല്കിയ യു പി എ ഗവണ്മെന്റിനാകട്ടെ ഈ വായ്പകള് നല്കിയതുകൊണ്ടുള്ള ‘ലാഭവിഹിതം’ ആവശ്യത്തിന് ലഭിച്ചിരുന്നതിനാല് ഇതിനെതിരെയൊന്നും ചെറുവിരലനക്കിയില്ല. എന്ന് പട്ടേല് ആരോപിച്ചു.
”എങ്ങനെയാണ് ഇന്ത്യന് സമ്പദ് വ്യവസ്ഥ ആ അപകടസ്ഥിതിയിലെത്തിയത്?. അനേകമാള്ക്കാരെ കുറ്റം പറഞ്ഞേ പറ്റൂ. 2014നു മുന്പ് ബാങ്കുകളുമായി ബന്ധപ്പെട്ട തല്പരകക്ഷികളാരും അവനവന്റെ ജോലി കൃത്യമായി ചെയ്തില്ല എന്നതില് ഒരു സംശയവുമില്ല. അത് പൊതുമേഖലാ ബാങ്കുകളായാലും റിസര്വ് ബാങ്കായാലും ഗവണ്മെന്റായാലും” പട്ടേല് പറഞ്ഞു.
ആവശ്യത്തിനു വികസനനടപടികള് നടത്താതെ വെറുതേ വളര്ച്ചാ നിരക്ക് കൂട്ടിക്കാണിക്കാന് യാതൊരു മാനദണ്ഡവുമില്ലാതെ ശതകോടിക്കണക്കിനു രൂപ വായ്പകള് നല്കാന് ബാങ്കുകളെ പ്രോത്സാഹിപ്പിച്ചിരുന്ന മന്മോഹന് സിംഗ് ഗവണ്മെന്റിന്റെ നയങ്ങളാണ് ഇത്രയും കിട്ടാക്കടങ്ങളുണ്ടാക്കിയതെന്ന് ഇതിനു മുന്പും സാമ്പത്തികശാസ്ത്രജ്ഞര് ചൂണ്ടിക്കാട്ടിയിട്ടുണ്ട്. ഊര്ജിത് പട്ടേലിനു മുന്പ് റിസര്വ് ബാങ്ക് ഗവര്ണറായിരുന്ന രഘുരാം രാജന് പോലും യു പി എ ഗവണ്മെന്റിന്റെ സമയത്താണ് ഏറ്റവും കൂടുതല് കിട്ടാക്കടങ്ങളുണ്ടായതെന്ന് 2018ല് പാര്ലമെന്ററി സമിതിയ്ക്ക് മുന്നില് തുറന്ന് സമ്മതിച്ചിരുന്നു.
Discussion about this post