രാജ്യസഭയിലേക്ക് മത്സരിക്കുന്ന മുന് പ്രധാനമന്ത്രി മന്മോഹന് സിംഗിനെതിരെ രാജസ്ഥാനില് സ്ഥാനാര്ത്ഥിയെ നിര്ത്തില്ലെന്ന് ബി.ജെ.പി. രാജസ്ഥാനിലെ രാജ്യസഭ സീറ്റിലേക്ക് ബി.ജെ.പി സ്ഥാനാര്ത്ഥിയെ മത്സരിപ്പിക്കുന്നില്ലെന്ന് മുതിര്ന്ന ബി.ജെ.പി നേതാവും പ്രതിപക്ഷ നേതാവുമായ ഗുലാബ് ചന്ദ് കതാരിയ പറഞ്ഞു. മന്മോഹന് സിംഗ് ഇന്നലെ രാജ്യസഭയിലേക്ക് മത്സരിക്കുന്നതിന് വേണ്ടി നാമനിര്ദേശ പത്രിക സമര്പ്പിച്ചിരുന്നു. ഇതോടെ മന്മോഹന് സിംഗ് രാജ്യസഭ പ്രവേശനം നേരത്തെ ഉറപ്പിച്ചു. ഇന്ത്യ ടുഡേ ടി.വിയാണ് ഇക്കാര്യം റിപ്പോര്ട്ട് ചെയ്തത്.
ബി.ജെ.പി സംസ്ഥാന അദ്ധ്യക്ഷനും രാജ്യസഭ എം.പിയുമായിരുന്ന മദന്ലാല് സെയ്നി അന്തരിച്ചതിനെ തുടര്ന്നാണ് രാജസ്ഥാനില് സീറ്റ് ഒഴിവ് വന്നത്. മന്മോഹന് സിംഗ് ഇത്തവണ തെരഞ്ഞെടുക്കുകയാണെങ്കില് 2024 ഏപ്രില് 3 വരെയാവും കാലാവധി.
ഏതാണ്ട് 30 വര്ഷത്തോളമായി ആസാമില് നിന്നുള്ള രാജ്യസഭ എം.പിയായിരുന്നു മന്മോഹന് സിംഗ്. ആസാമില് നിന്ന് ഇത്തവണ രാജ്യസഭയിലേക്ക് മന്മോഹന് സിംഗിനെ അയക്കാനുള്ള അംഗസംഖ്യ കോണ്ഗ്രസിനില്ല. അതിനാലാണ് രാജസ്ഥാനില് മത്സരിക്കാന് മന്മോഹന് സിംഗ് തീരുമാനിച്ചത്.
126 അംഗങ്ങളുടെ പിന്തുണയാണ് മന്മോഹന് സിംഗിന് ജയിക്കാന് വേണ്ടത്. 100 പേരാണ് കോണ്ഗ്രസിന് രാജസ്ഥാനില് ഉള്ളത്. ബിഎസ്പി, സ്വതന്ത്രര് എന്നിവരുടെ പിന്തുണ ഉണ്ടെങ്കില് മാത്രമേ അദ്ദേഹത്തിന് ജയം ഉറപ്പാവുകയുള്ളു. ബിജെപി മത്സരിച്ചാലും നിലവില് മന്മോഹന് സിംഗ് തെരഞ്ഞെടുക്കപ്പെടുന്ന അവസ്ഥയാണ് ഉള്ളതെന്ന് കോണ്ഗ്രസ് അവകാശപ്പെടുന്നു.
Discussion about this post