എംജി സര്വ്വകലാശാല മാര്ക്ക് ദാന വിവാദത്തില് ഗവര്ണര് വൈസ്ചാന്സലറോട് റിപ്പോര്ട്ട് തേടി. പ്രതിപക്ഷ നേതാവ് രമേശ് ചെന്നിത്തലയും മന്ത്രി കെ ടി ജലീലും തമ്മിലുള്ള ആരോപണ പ്രത്യാരോപണങ്ങള് കൊഴുക്കുന്നതിനിടെയാണ് ഗവര്ണര് റിപ്പോര്ട്ട് തേടിയിരിക്കുന്നത്.
അതേസമയം മാര്ക്ക് ദാനവുമായി ബന്ധപ്പെട്ട് പ്രതിപക്ഷ നേതാവ് രമേശ് ചെന്നിത്തലയ്ക്കെതിരെ പ്രത്യാരോപണവുമായി മന്ത്രി കെ.ടി ജലീല് രംഗത്തെത്തി. കേരളത്തിലെ പ്രമുഖനായ ഒരു രാഷ്ട്രീയ നേതാവിന്റെ മകന് സിവില് സര്വീസ് ലഭിച്ചതിൽ അന്വേഷണം വേണമെന്ന് കെ.ടി ജലീല് ആവശ്യപ്പെട്ടു.
ആ സിവില് സര്വീസ് പരീക്ഷയില് എഴുത്ത് പരീക്ഷയില് ഒന്നാം റാങ്ക് കിട്ടിയ അനുദീപ് ഷെട്ടിയെക്കാള് 30 മാര്ക്ക് അഭിമുഖ പരീക്ഷയില് പ്രമുഖ നേതാവിന്റെ മകന് കിട്ടി. ഇതിനായി ഡല്ഹിയില് ലോബിയിങ് നടത്തിയവര് തങ്ങളെപ്പോലെയാണ് മറ്റുള്ളവരും എന്ന് കരുതിയാല് അവരെ കുറ്റപ്പെടുത്താന് കഴിയില്ല. നേതാവ് ആരാണെന്ന് പേരെടുത്തു പറയാതെയായിരുന്നു ജലീലിന്റെ പ്രസ്താവന.
എന്നാല് മകനെതിരെ ആരോപണം ഉന്നയിക്കുന്നത് അപമാനിക്കാനാണെന്ന് ചെന്നിത്തല പറഞ്ഞു. സിവില് സര്വ്വീസ് പരീക്ഷാ നടപടികള് ആരോടെങ്കിലും ചോദിച്ചറിയണം. ഇത്തരം ആരോപണങ്ങള് കേട്ടാല് പൊതുസമൂഹം ചിരിക്കുമെന്നും ചെന്നിത്തല പറഞ്ഞു.
Discussion about this post