ശബരിമലയില്‍ തന്റെ വിധി നടപ്പാക്കണമെന്ന് ജസ്റ്റിസ് നരിമാന്‍ സോളിസിറ്റര്‍ ജനറലിനോട് ആവശ്യപ്പെട്ടു.സുപ്രീം കോടതി ഉത്തരവ് വായിച്ചു നോക്കാനും ഉദ്യോഗസ്ഥരെ അതിനെക്കുറിച്ച് ബോധവാന്മാരാക്കാനും നരിമാന്‍ ആവശ്യപ്പെട്ടു. കോടതി ഉത്തരവ് കളിക്കാനുള്ളതല്ലെന്ന്, മറ്റൊരു കേസിന്റെ വാദം കേള്‍ക്കുന്നതിനിടെ ജസ്റ്റിസ് നരിമാന്‍ പറഞ്ഞു.
കോണ്‍ഗ്രസ് നേതാവ് ഡികെ ശിവകുമാറിന്റെ ജാമ്യ ഹര്‍ജിയുമായി ബന്ധപ്പെട്ട കേസിലാണ്, എന്‍ഫോഴ്‌സ്‌മെന്റ് ഡയറക്ടറേറ്റിനു വേണ്ടി ഹാജരായ സോളിസിറ്റര്‍ ജനറല്‍ തുഷാര്‍ മേത്തയോട് ജസ്റ്റിസ് നരിമാന്‍ ശബരിമല കേസ് പരാമര്‍ശിച്ചത്. ഡികെ ശിവകുമാറിന്റെ കേസുമായി ബന്ധപ്പെട്ട് സോളിസിറ്റര്‍ ജനറലിന്റെ ഓഫിസിനെതിരെ കോടതി വിമര്‍ശനം ഉന്നയിച്ചിരുന്നു. ഈ കേസ് തീര്‍പ്പാക്കിയതിനു പിന്നാലെ ജസ്റ്റിസ് ആര്‍എഫ് നരിമാന്‍ ശബരിമല കേസ് എടുത്തിടുകയായിരുന്നു.
‘മിസ്റ്റര് സോളിസിറ്റര്‍ ജനറല്‍’ എന്ന് അഭിസംബോധന ചെയ്തുകൊണ്ടാണ്, ഇന്നലത്തെ വിധി വായിച്ചുനോക്കാന്‍ ജസ്റ്റിസ് നരിമാന്‍ സോളിസിറ്റര്‍ ജനറലിനോട് ആവശ്യപ്പെട്ടത്. വിധിയെക്കുറിച്ച് നിങ്ങളുടെ ഉദ്യോഗസ്ഥരെ ബോധവാന്മാരാക്കുക. കോടതി ഉത്തരവ് കളിക്കാനുള്ളതല്ലെന്ന്, ക്ഷുഭിതനായി ജസ്റ്റിസ് നരിമാന്‍ പറഞ്ഞു.
ജസ്റ്റിസ് നരിമാന്റെ പരാമര്‍ശങ്ങളോട് സോളിസിറ്റര്‍ ജനറല്‍ പ്രതികരിച്ചില്ല. പിന്നീട് മാധ്യമ പ്രവര്‍ത്തകര്‍ പ്രതികരണം ആരാഞ്ഞപ്പോഴും അദ്ദേഹം ഇക്കാര്യത്തില്‍ ഒന്നും പറഞ്ഞില്ല.
Discussion about this post