കൊച്ചി: പാലാരിവട്ടം പാലത്തിന്റെ ഭാരപരിശോധനയെ വീണ്ടും എതിര്‍ത്ത് സര്‍ക്കാര്‍. ഭാരപരിശോധന നടത്തണമെന്ന ഹൈക്കോടതി ഉത്തരവിനെതിരെ അപ്പീല്‍ നല്‍കാനാണ് തീരുമാനമെന്ന് മന്ത്രി ജി സുധാകരന്‍ പറഞ്ഞു. കഴിഞ്ഞ മാസമാണ് പാലത്തിന്റെ ഭാര പരിശോധന നടത്തണമെന്ന് ഹൈക്കോടതി ഉത്തരവിട്ടത്. ഭാരപരിശോധന മൂന്ന് മാസത്തിനകം നടത്തണമെന്നും പരിശോധനയ്ക്കുള്ള ചെലവ് പാലം നിര്‍മ്മിച്ച കരാര്‍ കമ്പനിയില്‍ നിന്നും ഈടാക്കാനും കോടതി നിര്‍ദേശിച്ചിരുന്നു. ഇതിനെതിരെയാണ് സര്‍ക്കാര്‍ അപ്പീല്‍ നല്‍കാനൊരുങ്ങുന്നത്.
നിയമ നടപടികള്‍ നീണ്ടതോടെ പാലാരിവട്ടം പാലം എന്ന് തുറക്കുമെന്ന കാര്യം അനിശ്ചിതത്വത്തിലായി. പാലത്തിന്റെ തകരാര്‍ പ്രതീക്ഷിച്ചതിലും വലുതാണെന്നാണ് വിദഗ്ധാഭിപ്രായം എന്നും ഇത് മുന്‍നിര്‍ത്തിയാണ് ഭാര പരിശോധനയ്ക്കെതിരെ അപ്പീല്‍ പോകാന്‍ തീരുമാനിച്ചതെന്നുമാണ് സര്‍ക്കാരിന്റെ വിശദീകരണം. സംഭവത്തില്‍ മുന്‍ പൊതുമരാമത്ത് മന്ത്രി ഇബ്രാഹിം കുഞ്ഞിനെതിരെ നിയമനടപടി തുടരാനും സര്‍ക്കാര്‍ തീരുമാനിച്ചതായാണ് വിവരം. നിയമനടപടി നീണ്ടാല്‍ പാലം തുറക്കുന്നതിനും കാലതമാസമുണ്ടാകും.
അപകടാവസ്ഥയില്‍ ആയതിനെ തുടര്‍ന്ന് മാര്‍ച്ച് 28 നാണ് സര്‍ക്കാര്‍ പാലം അടച്ചിടാന്‍ ഉത്തരവിട്ടത്. കൂടാതെ ഒരു മാസം കൊണ്ട് പാലത്തിന്റെ അറ്റകുറ്റ പണികള്‍ പൂര്‍ത്തീകരിക്കുന്നതിനായി ആര്‍ഡിഎസിന് കരാര്‍ നല്‍കി. എന്നാല്‍ അറ്റകുറ്റപ്പണികള്‍ കൊണ്ട് പരിഹാരിക്കാവുന്നതിലും വലിയ തകരാറാണ് പാലത്തിന് ഉള്ളതെന്ന് ബോധ്യപ്പെട്ടതോടെ പാലം ഉടന്‍ തുറക്കേണ്ടെന്ന നിലപാടില്‍ സര്‍ക്കാര്‍ എത്തുകയായിരുന്നു. ആര്‍ഡിഎസ് കമ്പനി ഉടമ സുമിത് ഗോയലും മുന്‍പൊതുമരാമത്ത് സെക്രട്ടറി ടി ഒ സൂരജുമടക്കം അഞ്ചുപേര്‍ അറസ്റ്റിലായ കേസില്‍ മുന്‍മന്ത്രി ഇബ്രാഹിംകുഞ്ഞും അഴിമതിയുടെ നിഴലിലാണ്. കമ്പനിയെ കരിമ്പട്ടികയില്‍ ഉള്‍പ്പെടുത്തി.
Discussion about this post