ഡല്ഹി: നിര്ഭയ കേസില് എല്ലാ പ്രതികള്ക്കും വധശിക്ഷ നടപ്പിലാക്കിയിരിക്കുമെന്ന് ഉപരാഷ്ട്രപതി വെങ്കയ്യ നായിഡു. രാജ്യത്ത് സ്ത്രീകള്ക്ക് നേരെ ഇത്തരത്തിലുള്ള അതിക്രമങ്ങള് തുടരാന് അനുവദിക്കില്ലെന്നും അദ്ദേഹം വ്യക്തമാക്കി. രാജ്യസഭയില് ആണ് അദ്ദേഹത്തിന്റെ പ്രതികരണം.
കേസിലെ പ്രതികള്ക്ക് നിയമപരമായ എല്ലാ അവകാശങ്ങളും നല്കിയിട്ടുണ്ട്. വീണ്ടും പ്രതികള് കോടതിയെ സമീപിക്കുന്നത് ശിക്ഷ വൈകിപ്പിക്കാനാണെന്നും ഉപരാഷ്ട്രപതി പറഞ്ഞു. വധശിക്ഷ നടപ്പാക്കുന്നതിന് ബന്ധപ്പെട്ട എല്ലാ ഓഫീസുകളും വേഗത്തില് നടപടികള് പൂര്ത്തിയാക്കണമെന്നും വെങ്കയ്യ നായിഡു അറിയിച്ചു.
ഈ മാസം ഒന്നിനാണ് നിര്ഭയ കേസിലെ നാല് പ്രതികളെയും തൂക്കിലേറ്റാന് മരണ വാറണ്ട് പുറപ്പെടുവിച്ചിരുന്നത്. എന്നാല് വധശിക്ഷ നടപ്പാക്കരുതെന്ന് ആവശ്യപ്പെട്ട് പ്രതികള് നല്കിയ ഹര്ജിയില് പട്യാല ഹൗസ് കോടതി വധശിക്ഷ സ്റ്റേ ചെയ്തിരുന്നു.
വധശിക്ഷ സ്റ്റേ ചെയ്ത കോടതി വിധിക്കെതിരെ കേന്ദ്രവും തീഹാര് ജയില് അധികൃതരും ഡല്ഹി ഹൈക്കോടതിയെ സമീപിച്ചിരുന്നു. വധശിക്ഷ നീട്ടിവെച്ച് പ്രതികള് രാജ്യത്തെ നിയമ വ്യവസ്ഥയെ പരിഹസിക്കുകയാണെന്ന് കേന്ദ്ര സര്ക്കാരിന് വേണ്ടി സോളിസിറ്റര് ജനറല് തുഷാര് മേത്ത കോടതിയില് പറഞ്ഞിരുന്നു. ഇന്ത്യയുടെ ചരിത്രത്തില് ആദ്യമായാണ് കൊടും കുറ്റവാളികള് രാജ്യത്തിന്റെ ക്ഷമ പരീക്ഷിക്കുന്നതെന്നും അദ്ദേഹം വ്യക്തമാക്കി.
Discussion about this post