പൗരത്വ ഭേദഗതി നിയമത്തിന്റെ പേരിൽ ഡൽഹിയിൽ നടന്ന കലാപത്തിന്റെ അന്വേഷണത്തിൽ ജനങ്ങളുടെ സഹകരണം ആവശ്യപ്പെട്ട് ഡൽഹി പോലീസ്.
കലാപകാരികളുടെ വിവരങ്ങളോ വീഡിയോകളോ കൈമാറാൻ മടിക്കരുതെന്ന് ഡൽഹി പൊലീസ് ജനങ്ങളോട് അഭ്യർത്ഥിച്ചു. വടക്കുകിഴക്കൻ ഡൽഹിയിലെ അക്രമ ബാധിത പ്രദേശങ്ങളിൽ താമസിക്കുന്ന ജനങ്ങളോടാണ് പോലീസുകാർ സഹകരണം അഭ്യർത്ഥിച്ചത്. അക്രമങ്ങൾക്ക് നേരിട്ട് സാക്ഷ്യംവഹിച്ച പൊതുജനങ്ങൾ, മാധ്യമപ്രവർത്തകർ, എന്തെങ്കിലും കലാപ ദൃശ്യങ്ങൾ മൊബൈലിൽ ഷൂട്ട് ചെയ്തവർ എന്നിവരോടെല്ലാം പോലീസ് ദൃശ്യങ്ങളും സാക്ഷിമൊഴികളും മടിച്ചു നിൽക്കാതെ നൽകാനാവശ്യപ്പെട്ടിട്ടുണ്ട്.
വിവരങ്ങൾ പങ്കുവയ്ക്കാൻ താൽപര്യമുള്ളവർക്ക് 8750871221, 8750871227 എന്നീ നമ്പറുകളിൽ ബന്ധപ്പെടാവുന്നതാണെന്ന് ക്രൈംബ്രാഞ്ച് അഡീഷണൽ കമ്മീഷണർ അറിയിച്ചു.
