കൊറോണ വൈറസ് നിരവധി പേരുടെ ജീവനെടുത്ത ഇറ്റലിയിൽ നിന്നും ഇന്ത്യക്കാരെ ഒഴിപ്പിച്ചു. ശനിയാഴ്ച ലഭ്യമായ കണക്കുകൾ പ്രകാരം ഇറ്റലിയിൽ വൈറസ് ബാധ മൂലം മരിച്ചത് 1,441 പേരാണ്.രക്ഷാ പ്രവർത്തനത്തിന് പോയ വിമാനം ഇന്ന് കാലത്ത് ഡൽഹിയിൽ തിരിച്ചെത്തി.
മിലാനിൽ നിന്നും പുറപ്പെട്ട വിമാനത്തിൽ, 211 വിദ്യാർഥികളടക്കം 218 യാത്രക്കാരുണ്ടായിരുന്നു. കേന്ദ്രമന്ത്രി വി മുരളീധരൻ ആണ് ഔദ്യോഗികമായി വാർത്ത സ്ഥിരീകരിച്ചത്. കൊറോണ വൈറസ് ബാധയേറ്റ് ഒരു ആഗോള മഹാമാരിയായി ലോകാരോഗ്യ സംഘടന പ്രഖ്യാപിച്ചതിനു തൊട്ടു പിറകെയാണ് കൊറോണ ബാധിത രാഷ്ട്രങ്ങളിൽ നിന്നും ഇന്ത്യക്കാരെ ഒഴിപ്പിക്കാനുള്ള തീരുമാനം കേന്ദ്രസർക്കാർ എടുത്തത്. യാത്രക്കാരെ എല്ലാവരെയും 14 ദിവസം ക്വാറന്റൈൻ ചെയ്ത് രോഗബാധയുടെ ലക്ഷണങ്ങളുണ്ടോയെന്ന് നിരീക്ഷിക്കുമെന്നും കേന്ദ്രമന്ത്രി വി.മുരളീധരൻ അറിയിച്ചു.
