ഡൽഹി: കൊവിഡ് 19 രോഗവ്യാപനത്തിന്റെ പശ്ചാത്തലത്തിൽ രാജ്യവ്യപക ലോക്ക് ഡൗൺ മെയ് 3 വരെ നീട്ടിയ സാഹചര്യത്തിലെ സ്ഥിതിഗതികൾ വിശദീകരിക്കാൻ കേന്ദ്ര ധനകാര്യമന്ത്രി നിർമ്മല സീതാരാമൻ പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തി.
ലോക്ക് ഡൗൺ നീട്ടിയ പശ്ചാത്തലത്തിൽ ധനകാര്യ രംഗത്ത് കൂടുതൽ ഇളവുകളും വ്യവസായ രംഗത്തിന് സഹായകരമായി ആശ്വാസ പാക്കേജും ഉടനുണ്ടായേക്കുമെന്നാണ് സർക്കാർ വൃത്തങ്ങൾ നൽകുന്ന സൂചന. പകർച്ചവ്യാധി ഏറ്റവും കൂടുതൽ ബാധിച്ചവർക്കായി പ്രത്യേക സാമ്പത്തിക പാക്കേജ് കേന്ദ്രം കഴിഞ്ഞ മാസം പ്രഖ്യാപിച്ചിരുന്നു. ലോക്ക് ഡൗൺ കാലഘട്ടത്തെ അതിജീവിക്കാൻ ദരിദ്രർക്കും ദുർബലർക്കും സാധ്യമായ എല്ലാ സഹായങ്ങളും ലഭിക്കണമെന്നതാണ് ഞങ്ങളുടെ ഉറച്ച തീരുമാനമെന്ന് പ്രധാനമന്ത്രി നരേന്ദ്ര മോദി പറഞ്ഞിരുന്നു. 1.75 ലക്ഷം കോടി രൂപയുടെ ഉത്തേജന പാക്കേജുമായി പ്രധാൻ മന്ത്രി ഗരീബ് കല്യാൺ യോജന നേരത്തെ കേന്ദ്ര സർക്കാർ പ്രഖ്യാപിച്ചിരുന്നു.
ജൻ ധൻ അക്കൗണ്ട് വഴി രാജ്യത്തെ സ്ത്രീകൾക്ക് 1500 രൂപ വീതം നേരിട്ട് നൽകുന്ന പദ്ധതി കേന്ദ്രസർക്കാർ നടപ്പിലാക്കിയിരുന്നു. കർഷകരുടെ വിഹിതമായി 2000 രൂപ വീതവും പ്രധാനമന്ത്രി ഉജ്ജ്വല യോജന പ്രകാരം സൗജന്യ ഗ്യാസ് സിലിണ്ടറുകളും കേന്ദ്രസർക്കാർ വിതരണം ചെയ്തു തുടങ്ങിയിരുന്നു.
ലോക്ക് ഡൗൺ പ്രഖ്യാപിച്ചിരിക്കുന്ന സാഹചര്യത്തിൽ ദേശീയ പാതകളുടെ പണികൾ പുനരാരംഭിക്കുന്നതിലൂടെ കുടിയേറ്റ തൊഴിലാളികൾക്ക് ജോലി നൽകുമെന്ന് കേന്ദ്രസർക്കാർ കഴിഞ്ഞ ദിവസം പ്രഖ്യാപിച്ചിരുന്നു.
നിലവിലെ സാഹചര്യത്തിൽ ഗ്രാമീണ മേഖലയുടെയും കാർഷിക മേഖലയുടെയും ശാക്തീകരണത്തിനുള്ള പ്രഖ്യാപനങ്ങൾക്കാകും ധനകാര്യ മന്ത്രി പ്രാമുഖ്യം നൽകുക എന്നാണ് സൂചന. വ്യവസായ മേഖല, ഇ- കൊമേഴ്സ്, വിവര സാങ്കേതിക മേഖല, ചരക്കു ഗതാഗതം, ഔഷധ വിപണന മേഖല എന്നിവയ്ക്കും പ്രത്യേക പാക്കേജിൽ പരിഗണന ഉണ്ടാകും എന്നാണ് സാമ്പത്തിക വിദഗ്ധരുടെ കണക്കു കൂട്ടൽ.
Discussion about this post