കൊച്ചി: കൊവിഡ് വ്യാപനത്തിന്റെ പശ്ചാത്തലത്തിൽ സംസ്ഥാനത്ത് പ്രഖ്യാപിച്ച സൗജന്യ പലവ്യഞ്ജന കിറ്റ് വിതരണം മുടങ്ങി. വെള്ള റേഷന് കാര്ഡ് ഉടമകള്ക്കുള്ള സൗജന്യ പലവ്യഞ്ജന കിറ്റ് വിതരണമാണ് മുടങ്ങിയത്. വെള്ളക്കാർഡുകൾക്ക് ഇന്ന് മുതൽ ഭക്ഷ്യധാന്യ കിറ്റുകൾ വിതരണം ചെയ്യുമെന്നായിരുന്നു അറിയിപ്പ്. എന്നാൽ, നീല കാർഡുകാർക്ക് പോലും ഇതുവരെ വിതരണം പൂർത്തിയായിട്ടില്ലെന്ന് ഉപഭോക്താക്കൾ പരാതിപ്പെടുന്നു.
പ്രതിദിനം 50 കിറ്റുകൾ മാത്രമാണ് നിലവിൽ ലഭിക്കുന്നതെന്ന് റേഷൻ കടക്കാർ പറയുന്നു. മിക്കയിടത്തും 400 ലധികം നീലക്കാർഡ് ഉടമകൾക്ക് ഭക്ഷ്യധാന്യ കിറ്റുകൾ ഇനിയും കൊടുക്കാൻ ബാക്കിയുണ്ട്. ഭക്ഷ്യധാന്യ കിറ്റുകളുടെ അഭാവത്തിൽ കിറ്റ് വാങ്ങാനെത്തിയ വെളളക്കാർഡ് ഉടമകളെ കടകളിൽ നിന്ന് തിരിച്ചയക്കുകയാണെന്നും അവരുടെ പ്രതിഷേധം തങ്ങളോടാണെന്നും കടക്കാർ പറയുന്നു.
അതേസമയം 21 മുതല് പിഎംജികെവൈ പ്രകാരമുള്ള റേഷന് വിതരണം ആരംഭിക്കുമെന്നും അതിന് മുൻപ് കിറ്റുകൾ വിതരണം ചെയ്യാൻ കഴിഞ്ഞില്ലെങ്കിൽ ഉപഭോക്താക്കളോട് എന്തു പറയണമെന്ന് അറിയില്ലെന്നും റേഷൻ കട ഉടമകൾ പറയുന്നു.
