തിരുവനന്തപുരം: കേരളത്തിൽ ഇത്തവണ ജൂൺ ഒന്നിന് തന്നെ കാലവർഷമെത്തുമെന്ന് കാലാവസ്ഥാ നിരീക്ഷണ കേന്ദ്രം. നേരത്തെ ജൂൺ എട്ടിന് കാലവർഷം കേരളത്തിൽ എത്തും എന്നായിരുന്നു കേന്ദ്ര കാലാവസ്ഥാ നിരീക്ഷണകേന്ദ്രത്തിന്റെ പ്രവചനം. എന്നാൽ ശനി-ഞായർ ദിവസങ്ങളിലായി അറബിക്കടലിൽ ഒമാൻ തീരത്തും, ലക്ഷദ്വീപ് തീരത്തുമായി രൂപം കൊള്ളാൻ സാധ്യതയുള്ള ഇരട്ടന്യൂനമർദ്ദങ്ങൾ കേരളത്തിലേക്ക് നേരത്തെ മൺസൂൺ മേഘങ്ങളെ എത്തിക്കുമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ ഏറ്റവും പുതിയ നിരീക്ഷണം.
കഴിഞ്ഞ ദിവസങ്ങളിൽ ഉംപുൻ ചുഴലിക്കാറ്റിനെ തുടർന്ന് സംസ്ഥാനത്ത് കനത്ത മഴ ലഭിച്ചിരുന്നു. ഇതിനെ തുടർന്ന് പല ജില്ലകളിലും വെള്ളപ്പൊക്കമുണ്ടായിരുന്നു. ഇതിന് പുറമെയാണ് അറബിക്കടലിൽ ഇരട്ട ന്യൂനമർദ്ദമുണ്ടാകുമെന്ന് പ്രവചിക്കപ്പെട്ടിരിക്കുന്നത്.
കഴിഞ്ഞ വർഷം ഒരാഴ്ച വൈകിയായിരുന്നു കേരളത്തിൽ കാലവർഷമെത്തിയത്. ആദ്യത്തെ ശക്തമായ പെയ്ത്തിന് ശേഷം ദുർബലമായ കാലവർഷം ആശങ്ക പടർത്തിയെങ്കിലും പിന്നീട് ശക്തമായി പെയ്തിറങ്ങുകയായിരുന്നു. ജൂലൈ- ഓഗസ്റ്റിൽ ശക്തി പ്രാപിച്ച കാലവർഷം 2018ലെ പ്രളയത്തിന്റെ പ്രതീതി പുനസൃഷ്ടിച്ചിരുന്നു. ഇത്തവണയും ശക്തമായ മഴ ലഭിക്കുമെന്ന് തന്നെയാണ് പ്രവചിക്കപ്പെട്ടിരിക്കുന്നത്.
Discussion about this post