ഡല്‍ഹി: ജനങ്ങളുമായി നേരിട്ട് സംവദിക്കാന്‍ പ്രധാനമന്ത്രി ഓള്‍ ഇന്ത്യ റേഡിയോയിലൂടെ ആരംഭിച്ച മന്‍ കി ബാത്ത് പരിപാടിക്ക് ശ്രോതാക്കള്‍ കുറയുന്നതായി വിവരവകാശ രേഖ. പരിപാടി സംബന്ധിച്ച് ശ്രോതാക്കളുടെ കത്തുകളുട കാര്യത്തില്‍ വന്‍ ഇടിവാണ് സംഭവിച്ചിരിക്കുന്നതെന്നും ഒരു പ്രമുഖ മാധ്യമം റിപ്പോര്‍ട്ട് ചെയ്യുന്നു. ഓള്‍ ഇന്ത്യ റേഡിയോവിലൂടെ ഒരു പരിപാടി എത്രമാത്രം ശ്രോതാക്കളിലേക്ക് എത്തുന്നു എന്നതിന്റെ സൂചനയാണ് പരിപാടി സംബന്ധിച്ച് എത്തുന്ന ശ്രോതാക്കളുടെ കത്തുകള്‍ വിലയിരുത്തപ്പെടുന്നത്.
മന്‍ കി ബാത്തില്‍ ഓരോ പരിപാടി കഴിയുമ്പോഴും ശ്രോതാക്കളുടെ പ്രതികരണം അറിയാനായി പ്രത്യേക സ്‌നാപ് പോളും സംഘടിപ്പിക്കുന്നുണ്ട്. 2014 ഡിസംബര്‍ 14 ന് നടത്തിയ മന്‍ കി ബാത്ത് സംബന്ധിച്ച് 5, 972 കത്തുകളാണ് ലഭിച്ചത്. പ്രധാനമന്ത്രിയും അമേരിക്കന്‍ പ്രസിഡന്റ് ബരാക് ഒബാമയും ഒരുമിച്ച് ജനുവരി 27 ന് നടത്തിയ പരിപാടി സംബന്ധിച്ച് 4,819 കത്തുകള്‍ ലഭിച്ചു. എന്നാല്‍ കാര്‍ഗില്‍ ദിനത്തോട് അനുബന്ധിച്ച് ജൂലൈ 26 ന് നടത്തിയ മന്‍ കി ബാത്ത് സംബന്ധിച്ച് 993 കത്തുകള്‍ മാത്രമാണ് ലഭിച്ചത്. പരിപാടി ഇപ്പോഴും ജനപ്രിയമാണെന്നും എന്നാല്‍ കത്തുകളുടെ സംഖ്യ കുറയുന്നതിന്റെ കാരണം അജ്ഞാതമാണെന്നുമാണ് ഓള്‍ ഇന്ത്യ റേഡിയോ അധികൃതര്‍ നല്‍കുന്ന വിശദീകരണം.
Discussion about this post