ലോകത്തിലെ ഏറ്റവും വലിയ ഓൺലൈൻ ഹാക്കത്തോൺ ഓഗസ്റ്റ് ഒന്നിന് : പ്രധാനമന്ത്രി നരേന്ദ്രമോദി പങ്കെടുക്കും

ന്യൂഡൽഹി : ലോകത്തിലെ ഏറ്റവും വലിയ ഓൺലൈൻ ഹാക്കത്തോണിന്റെ ഗ്രാൻഡ് ഫിനാലെ ഓഗസ്റ്റ് ഒന്നിന്.പ്രധാനമന്ത്രി നരേന്ദ്രമോദി പരിപാടിയിൽ പങ്കെടുക്കുമെന്ന് കേന്ദ്ര മന്ത്രാലയം അറിയിച്ചിട്ടുണ്ട്.സോഫ്റ്റ്‌വെയർ കമ്പനികളും ഐ.ടി വിദഗ്ധരും ഒത്തു ചേർന്ന് സംഘടിപ്പിക്കുന്ന മേളയാണ് ഹാക്കത്തോൺ മേളയിൽ പ്രധാനമന്ത്രി നരേന്ദ്രമോദി പങ്കെടുക്കുമെന്ന് അറിയിച്ചതിനോടൊപ്പം സ്മാർട്ട്‌ ഇന്ത്യ ഹാക്കത്തോൺ 2020-ന്റെ അന്തിമ പരിപാടികൾ ആഗസ്റ്റ് ഒന്നു മുതൽ മൂന്ന് വരെയായിരിക്കും നടക്കുകയെന്ന് കേന്ദ്ര മാനവ വിഭവശേഷി വികസന വകുപ്പ് മന്ത്രി രമേശ്‌ പൊഖ്‌റിയാൽ വ്യക്തമാക്കി.മാനവ വിഭവശേഷി വികസന വകുപ്പിനോടൊപ്പം ഓൾ ഇന്ത്യ കൗൺസിൽ ഫോർ ടെക്നിക്കൽ എഡ്യൂക്കേഷൻ, പെർസിസ്റ്റന്റ് സിസ്റ്റംസ്, ഐഫോർസി എന്നീ സ്ഥാപനങ്ങളാണ് ഹാക്കത്തോണിന് നേതൃത്വം നൽകുക.

കോവിഡ് വ്യാപനം നിലനിൽക്കുന്ന സാഹചര്യമായത് കൊണ്ടാണ് സ്മാർട്ട്‌ ഇന്ത്യ ഹാക്കത്തോൺ 2020 ഓൺലൈൻ വഴിയാക്കാൻ കേന്ദ്രം തീരുമാനിച്ചത്. പതിനായിരത്തിലധികം കുട്ടികൾ പങ്കെടുത്ത ഹാക്കത്തോണിന്റെ സമ്മാന തുക ഒരു ലക്ഷം രൂപയാണ്.രണ്ടും മൂന്നും സ്ഥാനങ്ങളിലെത്തുന്നവർക്ക് യഥാക്രമം 75,000 രൂപയും 50,000 രൂപയും ലഭിക്കും.331 പ്രോട്ടോടൈപ്പുകൾ മേളയിൽ വികസിപ്പിച്ചെടുക്കുമെന്നാണ് കരുതുന്നത്.