റഫാലിനേക്കാൾ മികച്ചത് ജെ-20യെന്ന് ചൈന : രണ്ടു ചോദ്യത്തിലൂടെ ഉത്തരം മുട്ടിച്ച് മുൻ എയർചീഫ് മാർഷൽ ബി.എസ് ധനോവ

ഇന്ത്യ പുതിയതായി വാങ്ങിയ റഫാൽ യുദ്ധവിമാനങ്ങൾ പീപ്പിൾസ് ലിബറേഷൻ ആർമിയുടെ അഞ്ചാം തലമുറ യുദ്ധവിമാനമായ ചെങ്‌ദു ജെ-20 നെക്കാൾ മികച്ചതല്ലെന്ന ഗ്ലോബൽ ടൈംസിന്റെ റിപ്പോർട്ടിനു തക്ക മറുപടിയുമായി മുൻ എയർ ചീഫ് മാർഷൽ ബി.എസ് ധനോവ.അഞ്ചാം തലമുറ യുദ്ധവിമാനങ്ങൾക്ക് കനാർഡുകൾ ഇല്ലെന്നിരിക്കെ ചൈനയുടെ ചെങ്‌ദു ജെ-20 യുദ്ധവിമാനങ്ങൾക്ക് എന്തിനാണ് കനാർഡുകൾ എന്നാണ് ധനോവ രാജ്യത്തോട് ചോദിച്ചത്.

ആഫ്റ്റർബർണറുകൾ ഉപയോഗിക്കാതെ മാക്ക് ഒന്നിന് മുകളിൽ എന്ത് കൊണ്ട് ‘മൈറ്റി ഡ്രാഗൺ’ എന്നറിയപ്പെടുന്ന ചെങ്‌ദു ജെ-20 വിമാനങ്ങൾക്ക് സൂപ്പർ ക്രൂയിസ്‌ ചെയ്യാൻ സാധിക്കുന്നില്ലായെന്ന ചോദ്യവും മുൻ എയർചീഫ് മാർഷൽ ചൈനയോട് ആരാഞ്ഞു. റഫാൽ വിമാനങ്ങൾ മൂന്നാം തലമുറ യുദ്ധവിമാനമാണെന്നും ചൈനയുടെ ജെ-20 യുമായി അതിനു കിടപിടിക്കാൻ കഴിയില്ലെന്നും ചൂണ്ടിക്കാട്ടി ചൈനീസ് സൈനിക വിദഗ്ദ്ധനായ സാങ് ഷുഫെങ്‌ കഴിഞ്ഞ ദിവസം രംഗത്തു വന്നിരുന്നു.സാങിനും കൂടിയുള്ള മറുപടിയാണ് മുൻ എയർചീഫ് മാർഷൽ ബിഎസ് ധനോവയുടെ ഈ ചോദ്യങ്ങൾ.