കോട്ടയം: പത്തനംതിട്ടയില്‍ 108 ആംബുലന്‍സില്‍ പീഡനത്തിനിരയായ യുവതി കോട്ടയം മെഡിക്കല്‍ കോളജിലെ ഐസൊലേഷന്‍ വാര്‍ഡില്‍ ആത്മഹത്യയ്ക്ക് ശ്രമിച്ചു. ഇന്ന് ഉച്ചയ്ക്കുശേഷമാണ് വാര്‍ഡിലെ ഫാനില്‍ കുരുക്കിട്ട് യുവതി ജീവനൊടുക്കാന്‍ ശ്രമിച്ചത്.
സംഭവം നഴ്‌സിന്റെ ശ്രദ്ധയില്‍പ്പെട്ടതിനെത്തുടര്‍ന്ന് ഐസൊലേഷന്‍ വാര്‍ഡില്‍ ഡ്യൂട്ടിയിലുണ്ടായിരുന്ന അറ്റന്‍ഡര്‍മാരും ജീവനക്കാരും ചേര്‍ന്ന് യുവതിയെ രക്ഷപ്പെടുത്തുകയായിരുന്നു.
വാര്‍ഡിലേയ്ക്കു മാറ്റിയ പെണ്‍കുട്ടിക്ക് പ്രഥമശുശ്രൂഷ നല്‍കി. പരിക്ക് ഗുരുതരമല്ലെന്ന് ആശുപത്രി അധികൃതര്‍ അറിയിച്ചു. ഈമാസം ആദ്യമാണ് പത്തനംതിട്ട അടൂരില്‍ 108 ആംബുലന്‍സില്‍ കൊവിഡ് രോഗിയായ യുവതിയെ ഡ്രൈവറായ നൗഫല്‍ പീഡനത്തിനിരയാക്കിയത്. പെണ്‍കുട്ടിയെ വീട്ടില്‍ നിന്ന് ഐസൊലേഷന്‍ കേന്ദ്രത്തിലേയ്ക്കു കൊണ്ടുപോവുന്ന വഴിയാണ് പീഡനം.
വിദഗ്ധചികില്‍സയ്ക്ക് വേണ്ടിയാണ് യുവതിയെ പത്തനംതിട്ടയില്‍നിന്ന് കോട്ടയം മെഡിക്കല്‍ കോളജിലേക്ക് മാറ്റിയത്. എന്നാല്‍, യുവതി പീഡനത്തിന്റെ ആഘാതത്തില്‍ നിന്ന് മുക്തമായിരുന്നില്ല. തുടര്‍ന്ന് യുവതിയെ ഐസൊലേഷന്‍ വാര്‍ഡിലേക്ക് മാറ്റുകയും കൗണ്‍സിലിങ്ങിന് വിധേയമാക്കുകയും ചെയ്യുകയായിരുന്നു. ഇതിനിടയിലാണ് യുവതി ആത്മഹത്യയ്ക്ക് ശ്രമിച്ചത്.
Discussion about this post