അനുരാഗ് കശ്യപിനെതിരെ പീഡനക്കേസ് ഫയൽ ചെയ്ത് ബോളിവുഡ് താരം പായൽ ഘോഷ്. അനുരാഗ് തന്നെ ലൈംഗികമായി ദുരുപയോഗം ചെയ്തിട്ടുണ്ടെന്ന് ദിവസങ്ങൾക്കു മുമ്പ്, സാമൂഹ്യ മാധ്യമങ്ങളിലൂടെ പായൽ വെളിപ്പെടുത്തിയിരുന്നു. ഇതിനു പിന്നാലെയാണ് വെർസോവ പോലീസ് സ്റ്റേഷനിൽ താരം പീഡനക്കേസ് ഫയൽ ചെയ്തിട്ടുള്ളത്.കൂടാതെ, ഐ.പി.സി സെക്ഷൻ 354 (സ്ത്രീകളുടെ അന്തസ്സിന് ക്ഷതമേല്പിക്കുക എന്ന ഉദ്ദേശത്തോടെ ആക്രമിക്കുക), 341(ബലപ്രയോഗത്തിലൂടെ തടഞ്ഞു വെയ്ക്കുക),342 (തട്ടിക്കൊണ്ടുപോയി അന്യായമായി തടങ്കലിൽ വെയ്ക്കുക )എന്നീ സെക്ഷനുകളും കൂടി ഉൾപ്പെടുത്തിയാണ് അനുരാഗ് കശ്യപിനെതിരെ നടി പരാതി നൽകിയിട്ടുള്ളത്.പായലിന്റെ അഭിഭാഷകനായ നിതിൻ സത്പുടെ ട്വിറ്ററിലൂടെ പരാതി നൽകിയ കാര്യം പങ്കു വെയ്ക്കുകയായിരുന്നു.
സെപ്റ്റംബർ 19നാണ് അനുരാഗ് കശ്യപ് തന്നെ ലൈംഗികമായി ദുരുപയോഗം ചെയ്തിട്ടുണ്ടെന്ന വെളിപ്പെടുത്തലുമായി പായൽ രംഗത്തു വന്നത്.ട്വിറ്ററിൽ അനുരാഗിനെ ടാഗ് ചെയ്ത് കൊണ്ട് പങ്കു വെച്ച പോസ്റ്റിൽ, അനുരാഗിനെതിരെ നടപടികളെടുക്കാൻ പ്രധാനമന്ത്രിയോട് പായൽ ഘോഷ് ആവശ്യപ്പെടുകയും ചെയ്തിരുന്നു.
