വാഷിംഗ്ടൺ : ജോൺസൺ & ജോൺസൺ കമ്പനിയുടെ മനുഷ്യരിലുള്ള വാക്സിൻ പരീക്ഷണം താൽക്കാലികമായി നിർത്തിവെച്ചു. പരീക്ഷണം അടിയന്തരമായി നിർത്തിവെച്ചത് വാക്സിൻ പരീക്ഷിച്ച ഒരാൾക്ക് അവശത അനുഭവപ്പെട്ടതിനെ തുടർന്നാണ്. “ഞങ്ങൾ താത്കാലികമായി മനുഷ്യരിലെ കോവിഡ് വാക്സിൻ പരീക്ഷണം നിർത്തിവെയ്ക്കുകയാണ്. മൂന്നാംഘട്ടത്തിലുള്ള എൻസെംബിൾ പരീക്ഷണവും നിർത്തിവയ്ക്കുന്നു. പരീക്ഷണത്തിൽ പങ്കെടുത്ത ഒരാൾക്ക് അവശത കണ്ടെത്തിയതിനെത്തുടർന്നാണിത്”-കമ്പനി അറിയിച്ചു.
ജോൺസൺ & ജോൺസൺ കമ്പനി 60,000 പേരെ വാക്സിൻ പരീക്ഷണത്തിനു ക്ഷണിച്ചുകൊണ്ടുള്ള ഓൺലൈൻ സംവിധാനവും പിൻവലിച്ചുവെന്നാണ് ലഭ്യമാവുന്ന വിവരങ്ങൾ. അതേസമയം, കോവിഡ് വന്നുപോകട്ടേയെന്ന തരത്തിലുള്ള മനോഭാവം അപകടകരമാണെന്നും മുൻകരുതൽ വേണമെന്നും ശക്തമായ മുന്നറിയിപ്പുമായി ലോകാരോഗ്യ സംഘടന രംഗത്തുവന്നിട്ടുണ്ട്.
രോഗം വന്നതിലൂടെയുണ്ടാകുന്ന ഹെർഡ് ഇമ്മ്യൂണിറ്റി എന്ന സങ്കല്പം തന്നെ അപകടകരവും അധാർമികവുമാണെന്ന് ലോകാരോഗ്യ സംഘടന തലവൻ തെഡ്രോസ് അദനോം ഗെബ്രായേസസ് വ്യക്തമാക്കി.
Discussion about this post