പട്ന: ബിഹാര്‍ തെരഞ്ഞെടുപ്പില്‍ ബി.ജെ.പി സ്ഥാനാര്‍ഥികള്‍ എം.എല്‍.എമാരായി ജയിച്ചാല്‍ രാമക്ഷേത്ര ദര്‍ശനം സാധ്യമാക്കുമെന്ന് യു.പി മുഖ്യമന്ത്രി യോഗി ആദിത്യനാഥ്. ഭീകരവാദം ഇല്ലാതാക്കിയത് ബി.ജെ.പിയാണ്. പാകിസ്ഥാനിലേക്ക് കടന്നു കയറി തീവ്രവാദികളെ കൊന്നുവെന്ന് ബലാക്കോട്ട് വ്യോമാക്രമണത്തെ ഓര്‍മിപ്പിച്ച്‌ യോഗി പറഞ്ഞു. ബിഹാറില്‍ ബി.ജെ.പിയുടെ തെരഞ്ഞെടുപ്പ് റാലിയില്‍ പങ്കെടുത്ത് സംസാരിക്കുകയായിരുന്നു അദ്ദേഹം.
ആര്‍ട്ടിക്കള്‍ 370 റദ്ദാക്കുമെന്നത് ബി.ജെ.പിയുടെ വാഗ്ദാനമായിരുന്നു. നരേന്ദ്രമോദി അധികാരത്തിലെത്തിയതിന് ശേഷം ഇത് നടപ്പിലാക്കി. ഇന്ത്യന്‍ മണ്ണില്‍ ഇനി തീവ്രവാദം നടക്കില്ലെന്ന് പാകിസ്ഥാന് മനസിലായെന്നും യോഗി ആദിത്യനാഥ് പറഞ്ഞു.
അയോധ്യയില്‍ രാമക്ഷേത്ര നിര്‍മ്മാണം ആരംഭിച്ചതോടെ ബി.ജെ.പിയുടെ പ്രധാനപ്പെട്ട ലക്ഷ്യങ്ങളിലൊന്നാണ് സഫലമാകുന്നത്. ബി.ജെ.പി എം.എല്‍.എമാരെ വിജയിപ്പിക്കുകയാണെങ്കില്‍ അവര്‍ നിങ്ങള്‍ക്ക് രാമക്ഷേത്ര ദര്‍ശനം സാധ്യമാക്കുമെന്നും യോഗി വ്യക്തമാക്കി.
ഒക്ടോബര്‍ 28ന് ബിഹാറില്‍ ആദ്യഘട്ട തെരഞ്ഞെടുപ്പ് നടക്കാനിരിക്കെയാണ് യോഗിയുടെ പ്രചാരണം ആരംഭിച്ചത്. 12ഓളം റാലികളില്‍ യു.പി മുഖ്യമന്ത്രി പങ്കെടുക്കുമെന്നാണ് ബി.ജെ.പി അറിയിച്ചിരിക്കുന്നത്.
Discussion about this post