“രാജ്യത്തിന്റെ വികസനത്തിനു പരിഷ്കരണങ്ങൾ ആവശ്യമാണ്” : പഴയ നിയമങ്ങൾ പലതും ബാധ്യതയായി മാറിയെന്നും പ്രധാനമന്ത്രി നരേന്ദ്രമോദി

ന്യൂഡൽഹി: രാജ്യത്തിന്റെ വികസനത്തിനു പരിഷ്കരണങ്ങൾ ആവശ്യമാണെന്ന് പ്രധാനമന്ത്രി നരേന്ദ്രമോദി. കഴിഞ്ഞ നൂറ്റാണ്ടിലെ ചില നിയമങ്ങൾ ഇന്ന് രാജ്യത്തിനു ബാധ്യതയായി മാറിയെന്നും സമഗ്രമായ പരിഷ്കരണത്തിലാണ് സർക്കാർ വിശ്വസിക്കുന്നതെന്നും പ്രധാനമന്ത്രി പറഞ്ഞു.

ആഗ്രാ മെട്രോ പദ്ധതിയുടെ നിർമ്മാണോദ്ഘാടനം നിർവഹിക്കവെയാണ്‌ അദ്ദേഹം ഈ കാര്യങ്ങൾ പറഞ്ഞത്. ചടങ്ങുകൾ നടന്നത് വീഡിയോ കോൺഫറൻസിങ് വഴിയായിരുന്നു. “വികസനത്തിന് പരിഷ്കരണം വേണം. കഴിഞ്ഞ നൂറ്റാണ്ടിൽ നല്ലതായിരുന്ന ചില നിയമങ്ങൾ ഇപ്പോൾ രാജ്യത്തിനു ബാധ്യതയായി മാറിയിട്ടുണ്ട്. ജനങ്ങൾ അഭിമുഖീകരിക്കുന്ന പ്രശ്നങ്ങൾ പരിഹരിക്കാനാണ് സർക്കാർ ശ്രമിക്കുന്നത്”- പ്രധാനമന്ത്രി കൂട്ടിച്ചേർത്തു. മാത്രമല്ല, നിക്ഷേപം വർധിപ്പിക്കണമെന്നും സാങ്കേതിക വിദ്യയുടെ പരമാവധി ഉപയോഗം ഉറപ്പാക്കണമെന്നും അദ്ദേഹം വ്യക്തമാക്കി.

ആഗ്ര മെട്രോ നിർമിക്കുന്നത് രണ്ടു കോറിഡോറുകളിലായി 29.4 കിലോമീറ്റർ ദൂരത്തിലാണ്. 8379.62 കോടി രൂപയാണ് പദ്ധതി ചെലവ്. താജ്മഹൽ, ആഗ്ര ഫോർട്ട് തുടങ്ങിയ വിനോദസഞ്ചാര കേന്ദ്രങ്ങളെ ഈ പദ്ധതി വഴി ബന്ധിപ്പിക്കും. പദ്ധതി അഞ്ചുവർഷം കൊണ്ട് പൂർത്തിയാക്കാനാണ് ഉദ്ദേശിക്കുന്നത്.