കൊടുവള്ളി: കൊടുവള്ളി നഗരസഭയിലെ യു.ഡി.എഫ് സ്ഥാനാർത്ഥിയുടെ തിരഞ്ഞെടുപ്പ് വിജയാഹ്ലാദ പ്രകടനം വിവാദത്തിൽ. കൊടുവള്ളി നഗരസഭയിലെ മോഡേൺ ബസാർ ഡിവിഷനിൽ ജയിച്ച യു.ഡി.എഫ് സ്വതന്ത്ര സ്ഥാനാർത്ഥി പി.കെ സുബൈറിന്റെ ആഹ്ലാദ പ്രകടനത്തിൽ സ്വർണക്കടത്ത് കേസ് പ്രതി അബു ലെയ്സ് പങ്കെടുത്തതാണ് ഇപ്പോൾ വിവാദമായിരിക്കുന്നത്.
നേരത്തെ കാരാട്ട് ഫൈസലിന്റെ തിരഞ്ഞെടുപ്പ് വിജയാഹ്ലാദ പ്രകടനത്തിൽ സി.പി.എം പതാക ഉപയോഗിച്ചത് വലിയ വാർത്തയായിരുന്നു. അതിന് പിന്നാലെയാണ് ഈ സംഭവം. വോട്ടെണ്ണൽ ദിവസം സുബൈറിന്റെ തെരഞ്ഞെടുപ്പ് ഫലപ്രഖ്യാപനം നടന്ന ഉടൻ സുബൈറിനെയും ആനയിച്ച് നടത്തിയ പ്രകടനത്തിലാണ് കരിപ്പൂർ സ്വർണക്കടത്ത് കേസിൽ പ്രതി ചേർക്കപ്പെട്ട അബു ലെയ്സ് പങ്കെടുത്തത്. വർഷങ്ങളോളം വിദേശത്ത് ഒളിവിൽ കഴിഞ്ഞ അബു ലെയ്സിനെ തൃശ്ശൂരിൽ ഒരു വിവാഹസൽക്കാരത്തിൽ പങ്കെടുക്കാൻ എത്തിയപ്പോൾ ഡി.ആർ.ഐ സംഘം അറസ്റ്റ് ചെയ്യുകയായിരുന്നു.
കോഫെപോസ പ്രകാരം ഏഴ്‌ മാസം ജയിൽശിക്ഷ അനുഭവിച്ചിട്ടുള്ള വ്യക്തിയാണ് അബു ലെയ്സ്. കൊടുവള്ളി നഗരസഭയിൽ കോൺഗ്രസിന് യു.ഡി.എഫ് നൽകിയ പത്ത് സീറ്റുകളിലൊന്നായിരുന്നു മോഡേൺ ബസാർ ഡിവിഷൻ. മോഡേൺ ബസാറിൽ 35 വോട്ടുകൾക്കാണ് എൽ.ഡി.എഫ് സ്ഥാനാർത്ഥിയെ പി. കെ സുബൈർ പരാജയപ്പെടുത്തിയത്.
Discussion about this post