ഡൽഹി: ഇന്ത്യയിലെ ആദ്യ ഡ്രൈവർ രഹിത മെട്രോ ട്രെയിൻ ഉദ്ഘാടനം ചെയ്ത് പ്രധാനമന്ത്രി നരേന്ദ്ര മോദി. ഡൽഹിയിലാണ് ഈ ട്രെയിൻ സർവീസ് നടത്തുന്നത്. വീഡിയോ കോൺഫറൻസ് വഴിയാണ് പ്രധാനമന്ത്രി ഉദ്ഘാടനം നിർവ്വഹിച്ചത്.
2025ഓടെ രാജ്യത്തെ 25 നഗരങ്ങളിൽ മെട്രോ സ്റ്റേഷനുകൾ സ്ഥാപിക്കുമെന്ന് പ്രധാനമന്ത്രി പറഞ്ഞു. 2014ൽ അഞ്ച് നഗരങ്ങളിൽ മാത്രമാണ് മെട്രോ ഉണ്ടായിരുന്നത്. ആറ് വർഷം കൊണ്ട് പതിനെട്ട് നഗരങ്ങളിലായി മെട്രോ സേവനം ലഭ്യമാക്കാൻ സാധിച്ചു. 2025ഓടെ ഇത് ഇരുപത്തിയഞ്ച് നഗരങ്ങളിൽ വ്യാപിപ്പിക്കാനാണ് കേന്ദ്ര സർക്കാർ ലക്ഷ്യമിടുന്നത്.
പറയുന്നത് വെറും കണക്കുകളല്ലെന്നും ജനങ്ങളുടെ ജീവിത സൗകര്യങ്ങൾ മെച്ചപ്പെടുത്തിയതിന്റെ ആധികാരികതയിൽ നിന്നാണ് താൻ സംസാരിക്കുന്നതെന്നും പ്രധാനമന്ത്രി പറഞ്ഞു. രാജ്യത്തെ ആദ്യത്തെ മെട്രോ സ്ഥാപിച്ചത് മുൻ പ്രധാനമന്ത്രി അടൽ ബിഹാരി വാജ്പേയിയുടെ കാലത്തായിരുന്നു. ഇന്ന് മേക്ക് ഇൻ ഇന്ത്യ പദ്ധതിയുടെ ഭാഗമായി രാജ്യമെമ്പാടും മെട്രോ അടക്കമുള്ള സേവനങ്ങൾ വൻ തോതിൽ വികസിക്കുകയാണെന്നും പ്രധാനമന്ത്രി വ്യക്തമാക്കി. ഡൽഹി മുഖ്യമന്ത്രി അരവിന്ദ് കെജരിവാളും ചടങ്ങിൽ സന്നിഹിതനായിരുന്നു.
