മലയാളി ക്രിക്കറ്റ്-സിനിമ പ്രേമികളെ ഒരേപോലെ ആവേശത്തിലാക്കി ചെന്നൈ സൂപ്പർ കിംഗ്സിന്റെ ഏറ്റവും പുതിയ സോഷ്യൽ മീഡിയ പോസ്റ്റ്. സിഎസ്കെ താരം സഞ്ജു സാംസണിനൊപ്പം മലയാളത്തിന്റെ പ്രിയ നടന്മാരായ നിവിൻ പോളിയും ഫഹദ് ഫാസിലും ഒരുമിച്ചുനിൽക്കുന്ന ചിത്രമാണ് ‘ചേട്ടന്മാരുടെ ലോകത്തേക്ക് സ്വാഗതം’ എന്ന രസകരമായ അടിക്കുറിപ്പോടെ ചെന്നൈ സൂപ്പർ കിംഗ്സ് ഔദ്യോഗികമായി പങ്കുവെച്ചത്.
ഇരുനൂറ് കോടിയും കടന്ന് വൻ വിജയത്തിലേക്ക് കുതിക്കുന്ന ‘ബെത്‌ലഹേം കുടുംബ യൂണിറ്റ്’ എന്ന ചിത്രത്തിന്റെ വിജയാഘോഷത്തിനിടെ പകർത്തിയ ഈ ചിത്രത്തിന് താഴെ ചിത്രത്തിലെ നായകൻ നിവിൻ പോളി ‘വിസിൽ പോട്’ എന്ന് കമന്റ് ചെയ്തതോടെ ആരാധകരും അത് ഏറ്റെടുത്തു. സഞ്ജു ചേട്ടനും ജസ്റ്റിൻ ചേട്ടനും രംഗൻ ചേട്ടനും ഒന്നിച്ച് എത്തിയെന്ന തരത്തിലും, ഇരുവരെയും സിഎസ്കെ ലേലത്തിൽ എടുത്തോ എന്നുമുള്ള കൗതുകകരമായ കമന്റുകളാൽ പോസ്റ്റ് നിമിഷങ്ങൾക്കകം സോഷ്യൽ മീഡിയയിൽ വൈറലായി മാറി. മുൻപും മലയാള സിനിമാ താരങ്ങളുമായി അടുത്ത സൗഹൃദം പുലർത്തുന്ന സഞ്ജു, ബേസിൽ ജോസഫ് ചിത്രം ‘അതിരടി’യുടെ സക്‌സസ് സെലിബ്രേഷനിലും മോഹൻലാലിനൊപ്പം കേരള ക്രിക്കറ്റ് ലീഗിന്റെ പ്രൊമോഷനിലും പങ്കാളിയായിരുന്നു.
അതേസമയം, ഇന്ത്യൻ ക്രിക്കറ്റ് ടീമിലേക്ക് ശക്തമായ തിരിച്ചുവരവ് നടത്താനൊരുങ്ങുകയാണ് സഞ്ജു സാംസൺ. സെപ്റ്റംബർ 13 മുതൽ ആരംഭിക്കുന്ന അഫ്ഗാനിസ്ഥാനെതിരായ മൂന്ന് ടി-20 മത്സരങ്ങളുടെ പരമ്പരയിലാണ് സഞ്ജു വീണ്ടും നീലക്കുപ്പായത്തിൽ കളത്തിലിറങ്ങുന്നത്.
അയർലൻഡ്, ഇംഗ്ലണ്ട് പരമ്പരകളിലെ ഫോമില്ലായ്മയെ തുടർന്ന് സിംബാബ്‌വെക്കെതിരായ ടി-20 പരമ്പരയിൽ നിന്ന് സഞ്ജുവിനെ ഒഴിവാക്കിയത് വലിയ ആരാധക പ്രതിഷേധങ്ങൾക്ക് വഴിവെച്ചിരുന്നു. ഇന്ത്യയുടെ ലോകകപ്പ് വിജയത്തിൽ സുപ്രധാന പങ്കുവഹിച്ച താരം അഫ്ഗാനിസ്ഥാനെതിരായ പരമ്പരയിലൂടെ തകർപ്പൻ പ്രകടനം കാഴ്ചവെച്ച് തന്റെ ബാറ്റിംഗ് കരുത്ത് വീണ്ടും തെളിയിക്കാനുള്ള തയ്യാറെടുപ്പിലാണ്.
