2019-ലെ തിരഞ്ഞെടുപ്പിൽ അമേഠി നഷ്ടപ്പെട്ടത് പോലെ 2024-ൽ കോൺഗ്രസിന് റായ് ബറേലിയും നഷ്ടപ്പെടുമെന്ന് കേന്ദ്രമന്ത്രി സ്മൃതി ഇറാനി. കോൺഗ്രസ് നേതാവ് രാഹുൽ ഗാന്ധി പുതുവത്സരമാഘോഷിക്കാൻ ഇറ്റലിയിലേക്ക് പുറപ്പെട്ടതിന് പിന്നാലെയാണ് കോൺഗ്രസിനെ വെല്ലുവിളിച്ച് സ്മൃതി ഇറാനി രംഗത്തു വന്നിരിക്കുന്നത്.
2019-ലെ തിരഞ്ഞെടുപ്പിൽ അമേഠിയിൽ സ്ഥാനാർത്ഥിയായിരുന്ന രാഹുൽ ഗാന്ധി പരാജയപ്പെട്ടത് സ്മൃതി ഇറാനിയോടാണ്. പ്രധാനമന്ത്രി നരേന്ദ്ര മോദിയെ അപകീർത്തിപ്പെടുത്തുന്ന രീതിയിലുള്ള പരാമർശങ്ങൾ രാഹുൽ ഗാന്ധി നടത്തുകയാണെന്നും ഇതുപോലെയാണ് പാർട്ടി മുന്നോട്ടു പോകുന്നതെങ്കിൽ റായ് ബറേലിയും കോൺഗ്രസിന് നഷ്ടമാവുമെന്ന് അവർ പറഞ്ഞു. സ്മൃതി ഇറാനിയുടെ മണ്ഡലമായ അമേഠിയിൽ സന്ദർശനം നടത്തുന്നതിനിടെ പ്രവർത്തകരെ അഭിസംബോധന ചെയ്ത് സംസാരിക്കവെയാണ് മന്ത്രി ഇക്കാര്യങ്ങൾ പറഞ്ഞത്.
കോൺഗ്രസ് ഇടക്കാല പ്രസിഡന്റ് സോണിയ ഗാന്ധിയുടെ മണ്ഡലമാണ് ഉത്തർപ്രദേശിലെ റായ് ബറേലി. അമേഠിയിലെത്തിയ സ്മൃതി ഇറാനി യുപി മുഖ്യമന്ത്രി യോഗി ആദിത്യനാഥുമായും കൂടിക്കാഴ്ച്ച നടത്തിയിരുന്നു.
Discussion about this post