ചെന്നൈ: തമിഴ്നാട്ടിൽ നിയമസഭാ തെരഞ്ഞെടുപ്പിന് തയ്യാറെടുത്ത് ബിജെപി. കോൺഗ്രസ് വിട്ട് പാർട്ടിയിലെത്തിയ നടി ഖുശ്ബു ചെപ്പോക്കിൽ ബിജെപി സ്ഥാനാർത്ഥിയാകാൻ സാദ്ധ്യത. ചെന്നൈയിലെ ചെപ്പോക്ക്-തിരുവള്ളിക്കനി നിയമസഭാ മണ്ഡലത്തില്‍ ഖുശ്ബുവിനെ മത്സരിപ്പിക്കാനാണ് ബിജെപി തയ്യാറെടുക്കുന്നത്.
നാലുമാസം മുമ്പാണ് കോണ്‍ഗ്രസ് വിട്ട് ഖുശ്ബു ബി.ജെ.പി.യില്‍ ചേര്‍ന്നത്. മണ്ഡലത്തില്‍ ഓഫീസ് ആരംഭിച്ച് ഖുശ്ബു തെരഞ്ഞെടുപ്പ് പ്രവർത്തനങ്ങൾ ആരംഭിച്ചു. കരുണാനിധി 1996 മുതല്‍ തുടര്‍ച്ചയായ മൂന്ന് തിരഞ്ഞെടുപ്പുകളില്‍ വിജയിച്ച മണ്ഡലമാണ് ചെപ്പോക്ക്.
കഴിഞ്ഞ രണ്ട് തിരഞ്ഞെടുപ്പുകളില്‍ വിജയിച്ചത് ഡിഎംകെ നേതാവായ ജെ. അന്‍പഴകനായിരുന്നു. കോവിഡ് ബാധിച്ച് അന്‍പഴകന്‍ മരിച്ചതിനെത്തുടര്‍ന്ന് സീറ്റ് ഒഴിഞ്ഞുകിടക്കുകയാണ്. കരുണാനിധിയുടെ കൊച്ചുമകനും സ്റ്റാലിന്റെ മകനുമായ ഉദയനിധി ഇത്തവണ ഇവിടെനിന്ന് മത്സരിക്കുമെന്നാണ് സൂചന. ഉദയനിധിയും സിനിമാ താരമാണ്.
തമിഴ്നാട്ടിൽ ശക്തമായ സ്വാധീനമുള്ള നേതാവാണ് ചലച്ചിത്ര താരം ഖുശ്ബു. സ്ത്രീകൾക്കിടയിൽ ഖുശ്ബുവിന് വലിയ പിന്തുണയുണ്ട്. കോൺഗ്രസ് നിർജീവാവസ്ഥയിൽ ആണെന്നും പാർട്ടിയിൽ നിന്ന് ജനങ്ങൾക്ക് വേണ്ടി ഒന്നും ചെയ്യാൻ സാധിക്കാത്തത് കൊണ്ടാണ് ബിജെപിയിൽ ചേരുന്നതെന്നും ഖുശ്ബു വ്യക്തമാക്കിയിരുന്നു.
Discussion about this post